تجربتي مع الصلع الوراثي واخيرا روحت للدكتور

السلام عليكم
ازيكم يا بنات يارب تكونوا بخير انا طبعا كنت كتبت قبل كدة عن مشكله شعري واستفدت جدا من كلامكم وقولتلكم اما اروح للدكتور حاقولكم التجربه كامله انا روحت للدكتور فعلا يوم السبت دة وسامحوني انا والله عاوزة اكتبلكم من يومها بس ظروفي ملخبطه اوي والحمد لله المهم ححكيلكم الي حصل

طبعا زي ما قولتلكم قبل كدة ان شعري خفيف من قدام لدرجة ان جلد راسي باين في اماكن كتييييييرة ودة وراثي لان تقريبا كل عايلتي كدة بالكامل سواء والدتي الله يرحمها او عماتي الموضوع زاد عندي جدااااااا في الفترة الاخيرة وطبعا جربت كل الوصفات الي تتخيلوها من نفسي ودي اكبر علطه عملتها وبجد اوعوا تجربوا وصفات او علاج من نفسكم لااااااازم تروحوا لدكتور متخصص لانه بيشوف الحاله وبيقدر يحدد الي يناسبها المهم اني روحت اادكتور وطبعا سال عن العايله وحد فيها شعرة كدة وشاف التحاليل الخاصه بالانيميا وخلافه وبعدين كشف علي الشعر وجلد الراس وعمل اختبار اسمه فرق الشعر قسم الشعر من قدام 5 اجزاء وشاف الفرق شكله ايه وشا الشعر من ورا وشاف نسبه التساقط وقالي الاتي :

اولا : دي حاله صلع وراثي واضحة والصلع الوراثي علاجة حاجة من اتنين زرع الشعر او العلاج بالميدوكسيل والحقن وخلافه مبيجيبش نتيجة مع الحالات الوراثيه نهائي

ثانيا : العلاج عشان يجيب نتيجة كامله بياخد سنه بعد كدة مهمه العلاج بتكون الحفاظ علي الشعر الي طلع مش تنميه شعر جديد لان خلاص كدة بتكون كل البصيلات الي عندنا خلاص

ثالثا : العلاج لازم الاستمرار عليه علطول ولو اتوقف الشعر بيقع فعلا ودي المشكله ومافيش حاجة اسمها مثبتات حتثبت الشعر الي طلع والكلام دة نهائي





رابعا : طبعا اداني نصايح مهمه عن التغذيه وخاصه العسل الاسود قالي اخد معلقه صغيرة يوميا والاكل الي فيه حديد وكالسيوم واستخدم بلسم بعد الشامبو عشان الشعر بيكون ضعيف جدا وهو مبلول ويتسرح بمشط واسع وهو مندي يعني انا يقرب ينشف مش بعد الحمام علطول

خامسا : العلاج الي وصفهولي لمدة 3 شهور وحاروحله الاعادة وقالي ان بعد 3 شهور مش حيكون في شعر طلع حتكون بس البصيلات اتفتحت

* ريجو 5 بخات صباحا
* هير باك 2 % 5 بخات مساءا
* هيرتون كبسوله كل يوم

دة الي وصفهولي واعتقد ان دة العلاج الوحيد للصلع الوراثي دعواتكم ربنا يشفيني والعلاج يجيب نتيجة ويفرج همي وهمومكم جميعا يارب