تجربتى مع مصيف مرسى مطروح عام 2008 الى 2025

و اتمني ان تنال التجربه علي اعجابكم .

في التجربه هحاول الكلام بشكل عامي علي قد ما اقدر علشان اوصل ليكم الاحساس , و هحاول علي قد ما اقدر اذكر ادق ادق التفاصيل .

تكاثرت الاقاويل في هذه المنطقه بس ليه انا اخترت اسافر مرسي مطروح ! , انا ديه اول مره اطلع مرسي في مطروح في حياتي , بس دايما كنت اسمع عن مرسي مطروح و جمال بحر مرسي مطروح و انه من كتر صفائه و نقائه تبقي في حاله دهشه من الجمال و عن عجيبه و حمام كليوباترا و الغرام و صخره ليلي مراد و شاطئ الابيض و و و و , فقولت مش معقول يبقي كل الجمال ده في مصر و الواحد يروح مكان تاني و كانت العقبه الوحيده هو طول مشوار السفر لان مرسي مطروح بتبعد عن القاهره حوالي 6 ساعات تقريبا بس تستاهل و هنشوف مع بعض تستاهل ولا لا .


مواصلات مرسي مطروح

احلي حاجه في مرسي مطروح انها بعيده بعيده عن الدوشه و الزحمه الي بنشوفهم في القاهره و يمكن في الاسكندريه في الصيف , المسافه من القاهره الي مرسي مطروح من 5 الي 7 ساعات تقريبا علي حسب مسافر بعربيه ولا سوبر جيت .
طبعا لو مسافر بعربيه بتبقي افضل بتفتح في السرعه براحتك و خفيفه و الوصول بيبقي اسهل و مش هتقف في ريست الا باختيارك و مش هتعدي علي كزا محطه علشان تخد ناس زي السوبر جيت
بس الاختيار الي كان انسب ليا هو كان اتوبيس السوبر جيت .
روحت موقف السوبر جيت في الماظه , لقيت في كزا ممر كده كان بقالي كتير مروحتش السوبر جيت و مش فاهم حاجه
المهم روحت علي شباك قولتله في حجز لمرسي مطروح قالي اه , قولتله هل في درجات , قالي لا الاتوبيس واحد اسمه VIP
ده تبع شركة غرب و وسط الدلتا , بكام قالي ب 80 جنيه , قولتله الميعاد الي عاوزه و قالي المواعيد و اخترت الكراسي الي انا عايزها .




وطبع ليا التذاكر و كان الميعاد الساعه 6:15 صباحا قالي حاول تيجي قبل الميعاد علشان الاتوبيس بيجي في ميعاده بالثانيه .
يوم السفر الي مرسي مطروح

طبعا قبلها بيوم بقي الشنط اتحضرت و المايوهات اتظبطت , و الاكل اتجهز الي هو بتاع الطريق , صحينا الصبح و ركبنا تاكسي و طلعنا علي موقف السوبر جيت في الماظه وصلنا تقريبا الساعه 6 , 6:15 بالظبط كان الاتوبيس بتاع مرسي مطروح وصل قدامنا , وبدأ اتنين من المحظه يفتحوا مكان الشنط و يخدوا مننا الشنط يحطوها و طبعا كل شنطه بيتلزق عليها ورقه معينه و انت بتخد نفس الورقه علشان لما تروح هناك تبقي عارف شنطك من شنط غيرك .
وتوكلنا علي الله ركبنا الاتوبيس لما بتطلع بتلاقي رقم الكراسي في التذاكر , الاتوبيس طبعا موجود فيه حمام بس منيل بستين نيله يادوب مياه و شكرا , مشكله السوبر جيت انه بيطلع بقي من الماظه الي عبد المنعم رياض الي الجيزه لانه بيخد ناس فده بيخد وقت شويه خاصه لو في وقت زحمه .
الاتوبيس انا عامل تجربه عنه لوحده بس في المجمل هو اتوبيس نظيف و مريح في شاشات لعرض مواد ترفيهيه افلام و كده , فيه حمام بس المياه فيه مش شغاله و مفيش فيه صابون و المياه علي اخرها فيه , التكييف جيد


لاكل و الشرب في مرسي مطروح

بالنسبه للمياه في مرسي مطروح فهناك مشكله فيها , المياه هناك بيعتمدوا فيها علي اجهزه تحليه للمياه , ومعظم الناس هناك عايشين علي خزانات مياه الي بتيجي عربيات المياه كل يوم الصبح و بتملي الخزانات و الموضوع مكلف جدا ده الي انا شوفته , و كل ما هتمشي في مطروح هتلاقي زجاجات المياه المعدنيه في كل مكان للبيع .
فاعمل حسابك انك كل يوم هتحتاج تشتري زجاجه مياه معدنيه الكبيره علشان الشرب و الاكل , ممكن الحمام بالمياه العاديه .
كنت بجيب زجاجه مياه معدنيه حياه 19 لتر ب 25 جنيه .
اما بالنسبه للاكل بلاش تشيلوا علي قلبكم الاكل لحد مرسي مطروح لان الاسعار في مرسي مطروح ممتازه زي الاسعار الي في اي مكان اخر .
مثلا انا اول يوم لما وصلت نزلت روحت علي ( فتح الله ) مرسي مطروح موجود في العوام علي الكورنيش عند فندق كليوباترا .
اسعاره فوق الممتازه و موجود كل ما يمكن ان تتخيله فيه جبن لحوم خضار مجمدات العاب اطفال ادوات منزليه حتي ادوات الكهرباء موجوده فيه و اسعاره زي هنا و زحمه جدا
بس خد بالك في بعض السوبر ماركت الي بتبقي في الشوارع دول بيعملوا نفسهم ناصحين و بيغلوا الاسعار ياريت شويه بيغلوا كتير , يعني زجاجه المياه جايبها من فتح الله ب 25 جنيه , في سوبر ماركت يقولي ب 30 , او علبه بلوبيف ب 16 جنيه في فتح الله , يقولي ب 25 جنيه , فالافضل انك تروح ماركت كبير تجيب حاجتك كلها اول لما توصل .
او انك تنزل تتمشي شويه لشارع الاسكندريه هتلاقي هناك كل حاجه بتوع فراخ و لحمه و سمك و خضار و عيش و اسعارهم زي الفل و الحاجه طازه قدامك .
شواطئ مرسي مطروح :

شواطئ مرسي مطروح كتير جدا منها العام و منها الخاص الي بفلوس , من اشهر شواطئ مرسي مطروح شاطئ العوام , شاطئ الليدو , شاطئ الفيروز , شاطئ روميل , شاطئ الابيض , شاطئ الغرام و غيره
انا هتكلم عن شاطئ العوام و الليدو و الغرام و الابيض علشان دول الي روحتهم بس بس .
شاطئ العوام :
اكثر شاطئ نزلت فيه علشان قدام البيت مباشره , شاطئ عام الدخول مجاني بتدفع بس لو عاوز تخد كراسي او طرابيزه و شمسيه من الي بيأجروا علي الشاطئ , الاربع كراسي و شمسيه ب 25 جنيه
الشاطئ شغال معقول ما هو بصراحه لو شوفت الابيض هتقول علي ده معقول اما لو شوفت بحر المحافظات الاخري فهيبقي بالنسبه ليك رهيب
مشكلته فيه في بعض الحتت صخور و المياه مش نقيه اوي و البحر بيرمي كتير طحالب ميته و بعض الزباله احيان و احيان .
ميزته انه مجاني و قريب من وسط البلد و الهيصه كلها



شاطئ الليدو :
الحته النضيفه من العوام , جنبه بشويه كده المياه فيه زي العوام بس انضف شويه و مفيش صخور كتير و بيتنضف كويس و القعده فيه حلوه في قهوه جوا و بتاع زلابيا و دلع
وبرضه في كراسي للتأجير و شماسي و كده
شاطئ الابيض :
ماذا اقول و اي قولا يقال بعد الي اتقال هيا كلمه واحده هاااااححح , ايه ده ! ايه الجمال ده ! شاطئ كده حاجه و هم وهم
المياه صافيه و نقيه و تفتح عينك تحت المياه تشوف , الرمال بيضاااااء و نظيفه و الهواء هناك رائع .
مش هتلاقي هناك غير الناس كييفه البحر ليه بقي علشان شاطئ الابيض بعيد عن وسط البلد بتركب ليه علشان تروح بتاع تقريبا نصف ساعه كده او اكثر شويه .
بس يستاهل
بس الكراسي هناك و الشمسيه اغلي شويه هيقولك ب 40 جنيه
احلي حاجه بقي هناك هتلاقي العاب مائيه زي هتلاقي الموزه banana boat التحفه
ايجارها هناك كان الفرد ب 25 جنيه الفه بس طويله شويه
بتركب علي الموزه و بتمسك في الحبل و بيخليك تلبس جاكيت الي بيخليك تعوم و اللنش بيشد الموزه في البحر و بيقولك لما يرفع ايده تسيب ايدك علشان تتحدف من علي الموزه في البحر بس جاااااااااااامده جدا
وفي الجيت سكي او بالبلدي موتوسيكل البحر , وده ايجاره كان الربع ساعه ب 100 جنيه بس رائع برضه
وفيه حمامات هناك تغيير فيها ملابسك و تستحمي ب 2 جنيه ( هتلاقي واحد هناك لو شغلت الدش جامد هيقولك حرام عليكم خزانات المياه بفلوس )
بجد لازم لو روحت مطروح تروح زياره لشاطئ الابيض .


ماكن للخروج و الزياره في مرسي مطروح :

في اماكن كده لازم هتلاقي اي حد بيروح مطروح لازم يروح هناك و من اهم هذه الاماكن ايه بقي ! ايوا عجيبه

شاطئ عجيبة :

هيا اسمها عجيبة و هيا عجيبة فعلا , طول ما انت هناك هتفضل تقول سبحان الله علي الجمال
مبدئيا شاطئ عجيبه بعد الابيض بعيد عن وسط البلد فهتحتاج ياما انت يكون معاك عربيه ملاكي او تأجر عربيه هناك او تخد تاكسي او في موقف تقريبا هناك ب 2 جنيه بيودي لعجيبه علي حسب ما سمعت
هناك العربيات التنايه مغرقه البلد هناك , ممكن تتفق مع اي واحد منهم يجيلك الصبح يوديك الي انت عايزه و يجي يخدك او يفضل معاك هو علي ما سمعت و الي اتفقت عليه المشوار لحد عجيبه و يوديك اي حته كمان ب 120 جنيه ممكن اقل طبعا
المشوار بتاع ساعه الا ربع من وسط البلد لعجيبه تقريبا , لما بتوصل هناك بتدفع تذكره دخول ب 3 جنيه .
المكان هناك حاجه خيال انت بتبقي طالع مكان فوق كده و هتلاقي عربيات كتير بتوع زوار اخرين
وبعدين هتبص بقي من فوق علي اجمل منظر ممكن تشوفه في حياتك , تدرج الالوان الزرقاء مع الهواء العليل مع لون الصخور يا رباااااااه
معظم الناس الكبار بتفضل قاعده فوق علي السور و الاستراحه مش بيقدروا ينزلوا لان علشان تنزل تحت بتنزل علي سلم طويل حبتين

وقبل ما ننزل تحت مع بعض , فوق بقي في سوبر ماركت و كافيه و في عارضين شويه تحف من الفخار و بعض الاشياء التذكاريه .
هننزل علي السلم بقي مع بعض و خد بالك و انت نازل علشان انت و انت نازل و عمال تتفرج علي جمال المنظر ممكن هوب تتزحلق
لما هتنزل تحت بقي ياما هتحجز شمسيه و كراسي و تقعد تتأكل بحر عجيبه الجميل او تخليك روش كده , وهوب تمشي علي الجنب ناحيه الصخور و تصور المناظر الجميله و تتفرج علي ابداع الخالق .
حاولوا تلبسوا حذاء يكون ماسك علي الرجل شويه لان حته الصخور ديه بتزحلق شويه و متعبه بس جميله جدا و هتلاقي في ناس نازله البحر و بتعوم رغم ان ديه حاجه مضيقاني علشان المنطقه من جمالها المفروض يعملوها محميه طبيعيه
وهتلاقي بقي صخور جميله جدا بس الشباب الله يكرمه كاتب عليهم ( محمد بيحب سلمي ) و ( خالد قلب هبه ) هههههه , لازم التاتش المصري برضه .
حمام كليوباترا :



ما هو مينفعش تيجي مطروح من غير ما تعدي علي حمام كليوباترا و تسمع الالشه الشهيره من الناس هناك ( اصل كليوباترا كانت بتستحمي هنا نيهاهاهاها ) ههههه اه والله لازم كل الي هناك يقول الالشه ديه
المكان هناك اول ما بتروح بتلاقي تمثال كليوباترا موجوده بره الناس كلها بتتصور معاه
وبعدين بتنزل شويه و بتمشي بقي علي الصخور ( اغلس حاجه ) تقعد تمشي كده عمال تتنطط شبه اليويو , علشان توصل لحمام كليوباترا
هو مش حمام بمعني كلمه حمام , ديه اعراض ناس يا اصدقائي , هو عباره عن كهف صخري كبير فيه مدخل بتتسلقه كده و بتدخل جوا هتلاقي زي ما الصور الي صورتها موضحه الكهف مفتوح من الاعلي للسماء في مكان مدخل للمياه من كهف صغير و مكان اخر بتخرج منه المياه
خد بالك كويس اوي و اكرر البس حاجه مريحه و تكون ماسكه في الرجل علشان متتزحلق و تتعور اسمع كلامي
وبلاش تدخل الممر الي بتدخل منه المياه لان انا دخلت علشان اصور و المياه جت قويه سحبتني و شبه اتزحلقت و ايدي اتعورت .
باقي بقي المكان بره هتلاقي حفر كده في الارض مليانه مياه بحر شكلها رائع و هتلاقي بعض الناس بتبيع ميداليات و حاجات فخار و ادوات بحر و كده .


كورنيش مرسي مطروح :


احلي ذكريات و احلي جو , يا سلام كده لما تتمشي وقت المغرب كده و الدنيا بتليل حلوي بتليل ديه , وتمشي بقي علي كورنيش مرسي مطروح و الهواء الجميل بتاع البحر يطلع كده يديك في وشك بس تبقي مبسوط منه
و يقابلك بقي بتاع الذره و تخليك يعملك كوز ذره سخن كده و مسكر ممممممم و بعدين قدام تلاقي بتاع الترمس و تخد منه شويه ترمس بالليمون و الشطه يفوقوك ما لسا الليل طويل و السهره علي الكورنيش للصبح
وبعدين تجيب ليك حمص الشام او يا سلام بقي تجيب واحد ايس كريم تحلي بيه و يديك شويه سعاده و تجيب للاطفال الي معاك ( غزل بنات ) الابيض و البمبي علشان يفرحوا كده ما احنا في مصيف بقي خربانه ههههه .
الكورنيش اولا بعيد عن ان كل شوارع مرسي مطروح تحس انها بتتمسح يوميا , الا ان الكورنيش حاله خاصه نظيف جدا جدا و بيتكنس طول الوقت .
ثانيا هتلاقي كل المطاعم الي تتخيلها قدامك في الكورنيش كنتاكي , ماكدونالدز , بيتزا هت , كوك دور , مؤمن , باسكن روبنز بتاع الايس كريم .
وملحوظه في هناك مطاعم رائعه غير المطاعم المعروفه زي مطعم اسمه سلطانه جبت منه كريب و بيتزا عجبني جدا و في مطاعم تانيه كتير علي طول الكورنيش .
وهتلاقي بقي قدام ماك و عند فتح الله في ملاهي اطفال و في سينمات 9D التذكره ب 25 جنيه , و في العاب اطفال بتبقي علي الرصيف و في المسرح الفني الي بيتعرض فيه كل يوم فقرات فنيه بس كان مشتغلش برضه زي السينما قالوا بعد رمضان .
زهقت بقي يا عم من الحته ديه كلها و كل الحاجات الحلوه ديه !!! ولا يهمك
امشي الناحيه التانيه في الاتجاه المعاكس للكورنيش و اطلع علي اخر الشارع عند فندق المشير احمد بدوي و نروح علي الي واخد صيت عالي اوي اوي ( جيلاتي عزه )
زحمه جدا روحنا و قولنا نجرب الجيلاتي عنده بصراحه شايفه عادي جدا جدا جد مش الحاجه الي تخليك تندهش و عامل عنه تجربه ممكن تشوفوها في الموقع و الصفحه .
خلصت الايس كريم ! تمام ! يلا نروح بقي من جنب عزه نودي الاطفال عند الملاهي و نروح نكشف عند الدكتور !
اه لا تستغرب احنا قدام اشهر دكتور زلابيا في الشرق الاوسط انه دكتور ( عضمضم ) اخصائي الزلابيا , استشاري بلح الشام , زميل جامعة صوابع زينب
حاجه كده حكايه بيعملك الزلابيا و بلح الشام و صوابع زينب قدامك كده و تخدها سخنه يمممممم حكااااااايه
ندخل بقي الاطفال الملاهي فيها لعب اطفال جميله جدا زي القطر , الساقيا , الفناجيل المتحركه و المراكب في حمام السباحه و الخ من الالعاب الي تبسط الاطفال و تبسط الكبار كمان
وانت طالع من الملاهي بقي هتلاقي في وشك علي طول السينما الصيفي حاجه كده اتحكي ليا عنها انها تحفه بتدفع بتاع 15 جنيه و تقعد تتفرج علي 3-4 افلام جديده ورا بعض
من 10 بليل لحد 6 الصبح لحد اما تروح في النوم و تروح بالعافيه
بس للاسف علي حظي كانت لسا مشتغلتش .


شارع الاسكندرية بمرسى مطروح :


لو مش عامل حسابك علي فلوس بلاااااااااش تنزل اسمع كلامي , مصمم تنزل برضه ! خلاص براحتك
شارع تجاري طويييييييل بيمتد من عند مبني المحافظه و المديريه لحد اخر بصرك
كله محلات ملابس علي سوبر ماركت علي محلات حلويات علي مطاعم علي قهاوي علي مقله علي محلات احذيه علي علي علي , مش قولتلك بلااااااش كان لازم يعني يا عصام كان هيتبقي معاك فلوس علشان رمضان و العيد يا اخي هههههه
لا بجد شارع جميل جدا و التسوق فيه ممتع لابعد حد
من اهم معالم شارع الاسكندريه
– هريسة احمد حسنين : ده موجود في منتصف شارع الاسكندريه تقريبا , ده بقي اجمد حد بيعمل هريسة فيكي يا مطروح , و كل زوار مرسي مطروح لازم بيعدوا عليه علشان يخدوا منه هريسه ليهم و هديه للناس لما يرجعوا , صحيح مطروح مش بتاعت هريسه زي اسكندريه بس علم برضه و الناس بتحبه و جبتلكم صوره للاسعار كمان اهو اي خدعه .
– مقلة و محمصة النصر : ما هو لازم تجيب لب , مطروح يعني لب و لب ابيض يعني مطروح , مقله جامده جدا لب و سوداني و حركات بس الي لاحظته ان في كزا واحد اسمه مقلة النصر واحد يقولك ديه محمصه النصر المسيحي و ديه محمصه النصر المسلم كان ناقص ثانيه و قلاقي محمصه النصر البوذي , حاجه عجب بس انا جربت الاثنين و كويسين جدا .
و هتلاقي بقي هناك في الشارع معمل البرج و مطاعم زي الدمياطي و حلويات معرفش ايه و صيدليات و كل ما تتخيله من الابره الي الصاروخ
و هتلاقي في شارع جانبي كده من شارع اسكندريه ده كله محلات سمك فيه اشهر واحد بتاع سمك في مرسي مطروح ( مجدي )
انت قولهم بس عاوز اروح لمجدي و الف مين هيدلك مجدي ده بتاع سمك و قدامه المطعم بتاعه و جنبه خالد بتاع السمك و جنبهم محلات سمك كتير
انا جربت خالد و انصح اي حد هيجيب سمك يبعد عن ( الماكريل ) يعني يا اخي تبقي مسافر مرسي مطروح و تأكل سمك مجمد ! اديها بلطي ولا دنيس ولا بوري و شويه جمبري و ولع الدنيا
مشكلته بس ان بيطول جامد جدا لانه زحمه يعني انا قعدت تقريبا ساعتين و نصف علي ما اخدت الحاجه .
ملحوظه جانبيه لو معاك اطفال و عاوزين يدخلوا حمام و انت في شارع اسكندريه في جامع كبير جنب الشارع تقدر توديهم هناك في الحمامات منفصله .






مسجد العوام :
لا اعرف قصه تسميه المسجد بهذا الاسم , و معرفتش اطلع بالقصه الحقيقيه , لان سمعت ان زمان واحد نزل يعوم مات طلعوا دفنوه و عملوا الجامع , الكلام مدخلش عقلي , ما علينا
بما ان البرج الي كنا فيه كان جنب مسجد العوام فكام لازم اروحه و اتفرج علي هذا المسجد الي شكله المعماري تحفه
المسجد جميل جدا ما شاء الله و استأذنت الرجل الطيب الي كان هناك و صورت داخل الجامع و صور للضريح الي عاملينه بالداخل


شويه ملاحظات :


– التواجد الامني في مرسي مطروح رائع انا طول اليوم اجد عربيات شرطه بتلف دايما .
– محافظ مرسي مطروح كان ماشي تحت البيت عندنا , اه والله زي ما بقولك كده كنت واقف تحت البيت لقيت المحافظ ماشي و ماشي وراه الحراسه بتاعته و قيادات من الامن لواءات و ماشي علي رجليه واخد الشارع و الكورنيش كله حاجه عجبتني الصراحه .
– الالوان هناك مريحه يعني تبص للبحر اللون الازرق يريح عينيك , تبص للشارع تلاقي الرصيف و اعمده الاناره و التاكسيات مدهونه باللون الازرق و الابيض .
– عمال النظافه هناك طوال اليوم بلاقيهم بيكنسوا الشوارع و في قمه , مفيش هناك عساكر في اشاره مرور بالتوقيت عد تنازلي و الناس هناك محترمه جدا , يعني كنت في الشارع الساعه 6 صباحا الشارع مفيش فيه عربيه بتعدي و مع ذلك لقيت عربيتين مش راضيين يعدوا الا لما اشارع المرور تخلص و تنور ليهم اخضر . تحيه ليهم بجد .
– الناس هناك ذوق و محترمه جدا , ضايقني بس ان بعض اصحاب المحلات و الي بيبعوا حاجات و بعض اصحاب التاكسي بيحاولوا يغلوا الاسعار علي الناس حتي علي اهل مطروح استغلالا لموسم الصيف .
العوده من مرسي مطروح

لما تسيب الراحه و الهدوء و ترجع الي الزحمه و الخنقه من تاني هو ده بيبقي احساسك في لحظتها
طبعا انا تاني يوم بعد لما وصلنا اخدت تاكسي و روحت موقف السوبر جيت حجزت تذاكر للعوده و كنت قولت اغير بقي الاتوبيس و قولت اجرب شركة الاتحاد العربي و هعمل عنها تجربه ان شاء الله منفصله
وزي ما قولنا في الذهاب التذكره ايضا ب 80 جنيه و اخترت اليوم و الساعه
وفي يوم العوده روحنا و انتظرنا الاتوبيس جيه في ميعاده بالظبط حملنا الشنط و روحنا علي قاهرة المعز
الطريق في العوده كان جميل انا اعتقد اننا وصلنا في حوالي 5-6 ساعات مع بوابه مرسي مطروح و هيا تودعنا

خريطة للاماكن مرسى مطروح




شاطئ باجوش : وهو عبارة عن خليج ويعتبر من اجمل
الشواطئ ويبعد عن مدينة مطروح حوالي 48 كم شرقاً .





شاطئ علم الروم : ويبعد عن مدينة مرسى مطروح بحوالي
12كم شرقاً ويعتبر من الشواطئ الجميلة بمطروح .

شاطئ الأبيض : ويبعد عن مرسى مطروح بحوالي
18كم غرباً ويمتاز هذا الشاطئ بالرمال البيضاء .






شاطئ عجيبة : ويبعد عن مرسى مطروح بحوالي
24 كم غرباً ويمتاز بالمناظر العجيبة الخلابة .








شاطئ روميل : ويقع بجزيرة رو ميل أمام الميناء الشرقي
لمدينة مرسى مطروح ويبعد عنها بمسافة 2.5 كم تقريباً،





شاطئ الغرام،