قصه تحت سابع ارض ، قصه سابع ارض

اميمة: سارة فيكي تساعديني و تاخدي انينة الحليب على الطاولة برا
سارة:اي ماشي
قمت من محلي و اخدت انينة الحليب الدافية و طلعت على الصالون ،شفت حماتي و رأفت قاعدين على الطاولة عم ياكلو ،كانت حماتي عم طعميه لرأفت بأيدا و تقلو كول يا حبيب الماما ،وقفت شوي عم اتفرج علين انا و مستغربة حتى انتبهت علي ازدهار
ازدهار:شبك واقفة هاتي انينة الحليب هلأ بتبرد
سارة:صباح الخير
ما حدا رد علي و كأنو صبحت على الكراسي ،حطيت انينة الحليب و رجعت على المطبخ ،قعدت على الكرسي و شردت ،طلعت اميمة تودي باقي الفطور على الطاولة و رجعت بعد شوي
اميمة:شبك ...افطري ..عنا شغل كتير اليوم
سارة: شغل شو ؟
اميمة:تنظيف و جلي و تلميع الست ازدهار موسوسة نظافة و متقنة كتير ،بتحب كل شي يكون عم يلمع و يبرق
سارة:اممم بس انا شو دخلني بهالشغل ؟
اميمة: هيدي اوامر الست ازدهار
سارة : عفوا !! اوامر الست ازدهار
قمت من محلي
اميمة:لوين رايحة؟
طلعت من المطبخ انا و معصبة و رحت على الصالون ،كانو بعدن عم يفطرو ، سحبت الكرسي و قعدت جنب رأفت
ازدهار:انت مين سمحلك تقعدي معنا على الطاولة؟
سارة:انا مرة ابنك و هون مكاني
ازدهار:وقحة كمان ،عصبتيني عن هالصبح و نزعتي مزاجي ،روحي من وجهي
كان رأفت ساكت و عم ياكل ، صبيت كاسة حليب الي و تناولت خبزة
ازدهار:ييييي مع مين عم احكي ،عم قلك انقلعي من هون هيدا الفطور الي و لابني
سارة : رأفت بدي توضيح لهل الشي ،انا هون مرتك الا خدامة ؟
ازدهار : حياتي ماما جاوبها لهل الغبية
رأفت:ساااااارة نفذي اوامرا لامي و ما تجادليا ابدا
ازدهار:يا روحي ما تعصب حالك ما بسوالك التعصيب ،قومي من هون
حطيت الخبزة من ايدي و خنق صوتي و قمت فورا و رجعت على غرفتي انا و عم ابكي ،بعد ساعة فاتت عندي اميمة و شافتني نايمة بالتخت و عم ابكي
اميمة:سارة ...قومي يلا ...هلأ الست ازدهار بتعصب علي انا ،قومي بدا اياكي تنظفيلا غرفتا
سارة(تبكي): انا بدي بدي ارجع لمحل ما جيت ،انا ما كنت مفكرة حالي جاي هون لاخدم الخانوم ازدهار ،بدي ارجع عند عمتي
اميمة: يا حياتي ما تبكي قومي بدك تسايري وضعك هون
سارة:ليش تزوجني رأفت ؟
اميمة : ......يلا انا سابقتك على المطبخ الحقيني و ما تتأخري ما بدنا الست ازدهار تعصب منا
طلعت اميمة من غرفتي و انا بقيت عم ابكي ،بعد ساعة سمعت صوت اميمة و ازدهار
ازدهار:ويناااا هالحثالة
اميمة(تأتأ): خبرتا و قالتلي بس لغير تيابي بتطلع
فتحت باب الغرفة بعصبية و اطلعت علي و شافتني بالتخت
ازدهار : بعدك متسطحة مفكرة حالك اميرة قومي اشتغلي يلا
سارة(تبكي):انا ما جيت لاخدمك
ازدهار:عم تعلي صوتا علي ...اميمة نادي رأفت بسرعة يييي حاسة ضغطي نزل ...بسرعة
طلعت اميمة و انا بقيت اعلق مع ازدهار
سارة:انا بدي ارجع لعند عمتي ما رح ابقى اكتر هون
قمت من التخت و بلشت قيم تيابي من الخزانة ،لاجا رأفت
رأفت:ماما شبك
ازدهار: حياتي هالبنت بدا تموتني و تجيب اخرتي ،عم تعلي صوتا علي ما مرباية ابدا،ربيها من اول و جديد
سارة :انا مرباية ..
و قبل ما كمل جملتي ،هجم علي رأفت و بلش يضربني و انا عم صرخ و ابكي ، كانت اميمة واقفة و حاطة ايدا على تما اما ازدهار كانت واقفة و عم تبتسم
ازدهار:تقبر قلب امك شو رجال ...حاجتا امي بخاف عليك تتعب يا روحي...
بعد عني رأفت و امو ركضت عليه و صارت تهديه ،بعدين اطلعت على القطة و صارت تصرخ على اميمة كيف في قطة بالبيت و التفتت على رأفت
ازدهار:كبا برا بسرعة ،قطة ببيتي انا ،اميمة انت يلي بدك تتحاسبي على هالشي
حملا رافت للقطة و طلعو برا الغرفة ،ركضت علي اميمة
اميمة:قلتلك ما تعصبيها للست ازدهار ،شفتي شو صار فيكي هلأ...قومي غسلي وجهك
هدتني اميمة من ايدي و فتت على الحمام و غسلت وجهي و طلعت بوجهي بالمراية و التفتت على اميمة
سارة:انا لازم اطلع من هون ،بموت اذا بقيت
اميمة:مستحيل تقدري تطلعي
سارة:طلعيني من هون و شو ما بدك بعطيكي
اميمة :انت قاعدة تحت الارض و ما في الا مخرج واحد من هون ،الباب يلي دخلتي منو و لو فيني هربك كنت هربت انا بالاول
الجزء الرابع
سارة:شو يعني ؟،بدك اياني ابقى تحت رحمتا
اميمة: يلﻻا غسلي وجهك يلا
غسلت وجهي و رجعت اقعدت على التخت
اميمة:قومي ،بخاف ترجع و تشوفك بعدك قاعدة
سارة(تبكي): طيب ..قايمة
اميمة :خدي هدول التياب لبسين للشغل
اطلعت بالتياب ،كانو ممزعين و مهترين ،لبستن انا و عم ابكي ،بعدين رحت انا و اميمة على المطبخ ،اعطتني سطل مي و مساحة و قشاطة
اميمة :اطلعي على غرفة الست و نظفيا
سارة:انت نظفيلا اياها ،انا وكليني مهمة تانية
اميمة:ما بقدر هي قالتلي خلي سارة تنظف غرفتي
سارة:اممم فهمت ما بعرف ليش هالمعاملة و الكره و الحقد و ما بدر مني شي سيء
طلعت على غرفتا دقيت الباب دقتين ، و فتت ،اطلعت شمال و يمين ما شفت حدا ، كان ديكور الغرفة فخم كتير ،الغرب و الشرق مجتمعين بغرفة الست ازدهار ،كانت غرفة ملوكية ، رتبت التخت و بلشت نظف الغرفة يلي كانت بالاصل نظيفة ، كانت الحيطان كلها صور الها مع ابنا رأفت ، انا و عم نظف الغرفة دخلت ازدهار ، كنت عم مسح غبرة ، فتحت خزانتا و زتتلي كل سكربيناتا على الارض
ازدهار:بس تخلصي مسح غبرة ،امسحيلي هدول منيح
غصيت و حبست دمعتي
سارة:طيب
ازدهار:بدي اياهن يلمعو فهمانة يا ...كنتي ههههههههه
طلعت و سكرت الباب وراها ،خلصت تمسيح غبرة و قعدت على الارض مسح سكربيناتا للست ازدهار يلي كانت بتقصد من كل هالحركات انو تذلني ،كانو عم ينزلو دموعي على السكربينة و مسحن ،رفعت راسي ،كان في مراية الخزانة قبالي ، صفنت بصورتي على المراية ما عرفت حالي،اطلعت بالغرفة و حيطانا ،حسيتن عم يضحكو علي و يقلولي هاي هي سارة يلي كانت مدللة ابوا و اما ،هاي هي سارة يلي كان عندا طموح ،نزلت راسي و كملت مسح ،خلصت و صفيتن بالخزانة ، كانت الخزانة مليانة تياب بكل الوان و اجود الاقمشة، سكرتا و طلعت من الغرفة ،دقيت دقتين على باب الغرفة يلي كان جنب غرفة ازدهار ،فتحت الباب و فتت ،شفت رأفت نايم بالتخت ،وقفت فوق راسو ،كان على بالي كب سطل المي على راسو بس خفت يرجع يضربني ،بلشت بتنظيف الغرفة و على الصوت فاق رأفت هو و مكشر
رأفت:شو عم تعملي هون انت ؟
سارة:اااانا عم نظف الغرفة
رأفت:مين قلك تنظفيا ما بتعرفي انو انا اذا بكون نايم ما بحب حدا يفوت لعندي ،لك دبة النملة ما بحب اسمعا ،خدي هالاغراض و اطلعي لبرا و ما تنظفيا الا لما بكون ما بالبيت ...شبك واقفة ...ما سمعتي
سارة:سمعت سمعت
اخدت اغراض التنظيف و طلعت و انا و عم سكر الباب ،اجت الست ازدهار
ازدهار:شو كنت عم تعملي عند ابني؟
سارة:كنت عم نظف الغرفة
ازدهار:ما بقا تفوتي لهون ، هاي اختصاص اميمة فهمانة ،يلا روحي هلأ كملي شغلك بالمطبخ
نزلت على المطبخ ،شفت اميمة عم تنظف فروجة
سارة :شو عم تعملي ؟
اميمة :بدي نظفا و اسلقا و احشيا كرمال الغدا
سارة :شو ضل علي شغل ؟
اميمة :ولاشي اليوم بس تعي ساعديني بالغدا
سارة:انا ما بعرف اطبخ ابدا
اميمة:اي بعلمك
سارة:طيب....اميمة اديش الك هون ؟
اميمة : انا الي هون 5 سنين
سارة:خمسة!و كيف تحملتي كل هالشي؟
اميمة :مضطرة اتحمل
سارة:ليش؟
اميمة: انا كنت متزوجة و مبسوطة كتير و كان زوجي يشتغل بالمعمل عند رأفت بس تكهرب و مات لهيك رجعت عند بيت اخي قاسم و مرتو ،قام الست ازدهار عرضت عليه انو اشتغل عندن مقابل راتب كبير كل شهر و وافق اخي الطماع فورا و جيت لهون من خمس سنين و ما بقا طلعت
سارة:ما حاولتي تهربي ابدا؟
اميمة:حاولت اهرب ،مفتاح الباب بضل برقبة الست ازدهار و في نسخة برقبة رأفت و مرة كانت نايمة ،قربت شوي شوي و حاولت اخدا منو بس حست علي و خبرت اخي و اجا ضربني كتير و من وقتا ما عدت هالتجربة ابدا
و متل ما شايفة تعودت و انت بكرا بتتعودي
سارة :اتعود ؟طب ليش انا هون ؟انت هون لانو اخوكي عم ياخد عليكي مصاري و انااا شو !!
اميمة :....ما بعرف بس انت وضعك افضل من وضعي ،انت مرتو للسيد رأفت
سارة:ضحكتيني ،ليش مين هيدا السيد رأفت ،متلو متلنا ،مجرد حجر شطرنج بايدا لست ازدهار
اميمة : ايييه صح بس انت لازم تحاولي تغيري هالشي .....هلأ هيك الفروجة نظفت على الاخر ،منغمرا بالمي و منحط عليا المطيبات حتى تروح زنختا و تتنكه و تصير طيبة ...سارة ...مركزة معي؟
سارة:..اي..معك
قعدت على الطاولة و حطتلي الخضرة على الطاولة و بلشنا نفرما للسلطة ،اجا وقت الغدا و طلعت اميمة االفروجة على الطاولة يلي كانت ريحتا بتشق القلب
سارة:طب نحن شو بدنا نتغدا؟
اميمة :منتغدا بس يخلصو هن غدا بالاول
سارة:يعني رح ناكل فضلتن ،هيك قصدك
الجزء الخامس:
اميمة:......
بعد نص ساعة طلعت ازدهار جابت الاكل و رجعت ،بلشت تاكل
اميمة:تعي كلي
سارة:ما بدي ، ما الي نفس
قرفت و قمت و رجعت على غرفتي ،تسطحت على التخت و صفنت بالسقف ،كانت بقعة الرطوبة و العفونة عم تكبر يوم عن يوم ،حتى حسيتا وصلت لجواتي ، كان صوت بطني عم يزقزق من الجوع و خاصة ما فطرت منيح و اشتغلت ،غفيت انا و عم اصفن بالحيط ،و مافقت الا بالليل ،اول ما فقت ،شلحت تيابي و فتت لاتحمم ،فتحت المي كانت باردة كتير ،ما قدرت اتحمم ابدا ،رجعت طلعت و لبست قميص النوم و طلعت من الغرفة على روس اصابيعي ،كنت رايحة على المطبخ لاكل لانو كنت ميتة من الجوع ،كان البيت هدوء كتير ،و كانو الكل نايم ، تركت الضو مطفي وفتحت البراد و طلعت شو ضل من الفروجة المحشية و السلطة و حطيتا على الطاولة و بلشت اكل ،كان الاكل بارد انا و عم اكل سمعت صوت دعسات حدا نازل ،خفت و قمت من محلي و وقفت ورا الباب حتى ما حدا يشوفني ،كان صوت الدعسات عم يقرب اكتر ،وقف الشخص على الباب شوي و بعدين فات ،كان رأفت ،وقف جنب الطاولة و اطلع على الاكل و التفت حواليه ليدور على الشخص يلي كان قاعد عم ياكل ، شرب مي و طلع من المطبخ و بس سمعت صوتو راح ،طلعت من ورا الباب و رجعت قعدت لكمل اكلي
رأفت:هاي انت ؟
غصيت باللقمة و رفعت راسي شفت رأفت واقف عالباب،قمت شربت مي فورا
سارة:خوفتني
رأفت:عم تاكلي و تتحركي متل الحرامية
سارة:شو عم تعمل هون انت ،الاسياد ما بفوتو على مطابخ ،كل شي بجي لعندن ،كان قلا لاميمة تجبلك كاسة المي لعندك
رأفت:نايمة بس لو بعرف انك فايقة كنت قلتلك الك
تابعت اكل و انا عم احكي معو
سارة:ما بقدر جبلك الك شي؟
رأفت:ليش؟
سارة:بخاف من الست ازدهار لانو نبهت علي انو ما قرب لجنبك ابدا لهيك انا ما بقدر اخدمك ،انا باخد اوامري بس من الست ازدهار
رأفت:يعني اذا قلتلك جيبيلي كاسة مي هلأ ما بتجبيلي ؟
سارة:بعتذر بس لا ،لازم تسأل امك بالاول بعدين اذا امك وافقت انا بجبلك كاسة مي
رأفت:قومي جيبيلي كاسة مي ؟
سارة:ما بقدر
رأفت:قومي جيبيلي كاسة مي
سارة:ما بقدر
قرب علي و مسكني من ايدي بقوة و شدني على المجلى و تناول كاسة
رأفت: خدي عبييلي اياها مي
سارة :قلتلك ما بقدر لازم تاخد الاذن من الست ازدهار
طرق الكاسة بحوض المجلى و مسك ازازة و حطا على رقبتي
رأفت: و هلأ ، بدك تجيبي كاسسة مي الا بدك تنطري الست ازدهار لتجي تقلك بس ما بعرف اذا بتلحقك الا لا ؟
سارة :بدك تدبحني ؟
رأفت:شو شايفة؟
سارة: شايفة ازازة بايدك بس انا برأيي حتى بهالموضوع لازم تاخد الموافقة من الست ازدهار بلكي ما بدا اياني موت ،بلكي بدا تحتفظ فيني لاخدمكن
رأفت : انت عم تستفزيني ؟ ما بتعرفي انو يلي واقف قبالك واحد مجنون...
سارة: و يلي واقفة قبالك وحدة ما عندا شي تخسرو
تركني و قام الاكل عن الطاولة و حطو بالبراد
رأفت:ما في الك اكل ،روحي نامي
سارة:هههههههههه هيدا اكتر شي بتقدر تعملو مو
مسكني و لزقني بالحيط و ضربني كف
سارة : ههههههههه
رأفت :عم تضحكي؟
سارة: اضرب لسا ، شو ما عملت فيني انت ما بتزعجني بتعرف ليش لانو بحسك بعدك طفل صغير مدلل امو ،انا شايفتك اصغر مني اصلا
كنت عم حاول استفزو بحكيي ،كنت عم صغرو اكتر ما هو بنظري صغير ،بعد عني
رأفت:عندي شغل هلأ بس حسابك معي لسا ما بلش ،رح تشوفي الست ازدهار جنة بالنسبة الي
سارة:بس لشوفك بالاول
رجعت على غرفتي و انا مبسوطة كتير اني قدرت استفزو ، و وصلو فكرة انك بعدك طفل صغير و ما الك كلمة بهالبيت بعد كلام امك ،كملت نومتي و فقت تاني يوم الصبح على صوت اميمة عم تفيقني
اميمة:قومي يلا
سارة:صباح الخير
اميمة:صباح النور يلا غسلي وجهك و غيري تيابك و لحقيني على المطبخ
قمت من التخت ،غسلت وجهي و لحقتا لاميمة ،كانت عم تجهز الفطور كالعادة
اميمة:خدي هيدي الصنية على الطاولة
حملتا و طلعت ،شفت ازدهار و رأفت قاعدين بالصالون عم يتفرجو على التلفزيون ، حطيت الصحون على الطاولة ،ضربت عيني بعين رأفت ،زورني و انا ابتسمت و رجع دار وجهو ،كان مبين انو معصب من ليلة مبارح
ازدهار:حبيبي شبك اليوم ما على بعضك ،يا روحي عم يجعك شي
رأفت:لا ما فيني شي ماما
رجعت على المطبخ و بعد شوي سمعت صوت رأفت عم يناديني بصوت عالي ،رحت فورا لعندو ،كان قاعد عم يفطر جنب امو
سارة:ايه
رأفت: قربي لهون
قربت لعندو ،مسك صحن البيض و كبو على تيابي
رأفت: ريحتو زنخة ،ارجعي اقلي غيرو
وقفت مصدومة و عم اطلع على تيابي و الست ازدهار عم تطلع فيني شمتانة و عم تضحك ضحكة صفراوية
رأفت:شبك ما سمعتي شوقلتلك ..يلا بسرعة و تعي نضفي هالقرف
الجزء السادس:
اختفى صوتي و اخدت صحن البيض و رجعت على المطبخ ،انا و عم ابكي على الساكت
سارة:قال زنخ كتير ...ارجعي اقلي غيرو
اميمة:شبن تيابك
سارة:ولاشي ،انا فايتة غيرن ...ليكي بس مسحي محل ما انكب الصحن
رحت على غرفتي و غيرت تيابي انا و عم ابكي ،فتت غسل وجهي و ايدي ، بعدين اندق الباب و فاتت اميمة لعندي هي و متلبكة
اميمة : سارة ...روحي انت نظفي زنخة البيض
سارة:...رأفت هو يلي قلك قليلا لسارة هي يلي تجي تنظف مو؟
اميمة:ايه
سارة:طيب
رحت جبت سطل المسح و الممسحة و طلعت على الصالون ،كانو بعدن عم يفطرو ،وطيت على الارض على ركبي و بلشت مسح
رأفت:تعي مسحي هون تحت رجلي
رفع رجليه و انا مسحت الارض ،انا عم مسح ،انكبت كاسة حليب دافية علي ،انا صرخت صوت و ازدهار و رأفت صارو يضحكو علي ،قمت وقفت و كان الحليب عم ينقط من شعري و وجهي و تيابي
رأفت:هههههه دفشتا بايدي بالغلط عليكي
اطلعت عليه انا و شادة على ايدي و عم كز على اسناني ،زتيت الممسحة بالارض و ركضت على غرفتي انا و عم ابكي ،فتت فورا على الحمام ،شغلت المي ، كانت باردة كتير ،تحممت اناو عم ارجف و ابكي و بعدين طلعت انا و بردانة ،فتحت خزانتي ،لقيتا شبه فاضية من التياب ،و كل التياب يلي فيها تياب رقيقة ما بدفي بهالبرد ، ضلت بلوزة و بنطلون و لبستن و قعدت بالتخت ،صار البكا روتين يومي بحياتي بعد ما سكنت تحت الارض ، مسحت دموعي و طلعت على المطبخ ،كانت اميمة عم تجلي ،سحبت الكرسي و قعدت
سارة:ليش هيك عم يعملو فيني ،انا ما أذيت حدا بحياتي ....(تبكي)....ليش هيك عم يصير معي ...خسرت اهلي و دراستي و هلأ صفيت محبوسة هون عم دوق الذل بكل اشكالو من ناس معقدة و مريضة
اميمة:طولي بالك ...مافي شي بدوم بس انا مستغربة ليش هيك رأفت تصرف ،يعني بالعادة امو هي يلي بتعمل هيك شي و هو بكون مشاهد ،هالمرة انقلبت الادوار ....
سارة:فتحت خزانتي هلأ و ما لقيت كل تيابي ،انت اخدتين شي؟
اميمة:لا مو انا ،هاي ختيارة الجن ازدهار فاتت و اخدتلك اياهن
سارة: ليش ..شو بدا بتيابي.....روحي عم يناديلك
راحت اميمة تشوف شو بدو رأفت و رجعت بعد شوي
اميمة:اطلعي نظفي غرفتو
سارة:هو هيك قلك ؟
قمت من عن الكرسي انا و معصبة و رحت على الصالون كان قاعد هو و امو عم يضحكو ،اطلعت بازدهار
سارة: تنظيف غرفة رأفت ما من اختصاصي ،من اختصاص اميمة ما هيك قلتيلي ست ازدهار ؟
رأفت(يبتسم):اي بس انا بدي انت تنظفيا اليوم
ازدهار:اسمعي كلام ابني يلا روحي على شغلك
سارة:طيب بس افطر بطلع
رأفت:لا قبل ما تفطري لانو تعبان و نعسان و بدي اطلع نام
رجعت على المطبخ و اخدت اغراض التنظيف و طلعت على غرفتو ،فتت و سكرت الباب ،كانت غرفتو دافية كتير ،بعد شوي طلع رأفت هو و عم يتاوب
رأفت:لهلأ ما خلصتي ؟
سارة:لسا
كنت عم رتب تيابو بالخزانة ، زت حالو على التخت و حط ايديه تحت راسو
رأفت:رتبين منيح البلوز يلي من نفس اللون حطين فوق بعض
سارة:رأفت ليش تزوجتني ؟ما دام بدكن خدامة تانية ليش ما رحتو جبتو خدامة و خلص
رأفت: هاي جبنا خدامة ،هههههه ليش انتي شو !
سارة: انا جيت على هالبيت على اساس اني مرتك و انو رح تعاملني معاملة منيحة متل ما كان ابي يعامل امي ،هيك انا بعرف العلاقة بين اي اتنين متزوجين مبنية على الاحترام و الحب
رأفت :خلصي شغلك و اطلعي ...بدي نام
تابعت شغلي انا و عم احكي مع رأفت
سارة:بس وقت وصلت تفاجأت بنوعية البشر يلي عايشين هون ،ما بس طلعتو عايشين تحت الارض متل القنافذ، و كمان طلعتو سادين بتستمتعو انتو و عم تعذبو الناس و تهينون و تعاملون متل العبيد
رأفت:صح فعلا انا بنبسط كتير انا و عم هينك و ذلك
سارة: بس انا بزعل عليك ما بزعل منك او بالاحرى بشفق عليك لانو ما عندك غير هالاسلوب لتثبت حالك بهالبيت ، ببغاء شو بتعمل امك بتعيد وراها
قام من التخت متل المجنون و مسكني من ايدي
رأفت: انت عم تتجاوزي حدودك معي و هاي اخر انذار الك
مسك التياب يلي رتبتن و زتن على الارض
رأفت:ارجعي رتبين من اول و جديد
سكتت و قعدت على الارض و رجعت رتب فين ،انفتح الباب فجأة
ازدهار:لسا ما خلصتي ،الك ساعتين بهالغرفة
سارة:اذا بدك بتركا و خلي اميمة تجي تكفي عني
ازدهار:ايه اطل..
رأفت:لا هي يلي بدا تنظفا
ازدهار:حياتي انت نام ،جيت من شغلك تعبان و بس تفيق بتطلع اميمة بتكفي
رأفت: رح نام بس تخلص هالغبية شغل
اطلعت ازدهار بأبنا و زمت شفايفا انو ما عجبا هالحكي و طلعت و خبطت الباب
سارة:ههههههههه
رأفت:ليش عم تضحكي؟
سارة: حبيت هالمشهد كتير ،كان فريد من نوعو ،رأفت خالف رأي امو لاول مرة
رأفت:التهي بشغلك احسن ما خليكي ترجعي ترتبين من اول و جديد للمرة التالتة
سارة:برتبن ما عندي مشكلة قاعدة مبسوطة و عم اتساير معك ،وين رحت بقطتي؟
رأفت:عملتا وليمة للذئاب يلي بالغابة ،لو بتشوفي اول ما زتتلن اياها كيف ركضو عليها و ما تركو قطعة منها حتى العظم اكلوه ،كانت عم تنوي بصوت عالي مياووو مياوووو سارة الحقيني هههههه يمكن كانت عم تناديكي
سارة (تبكي): انت واحد ما في بقلبك رحمة
حطيت ايدي على وجهي انا و عم ابكي و عم اتخيل منظرا كيف عم ياكلوها الذئاب ،تركت التياب و قمت لاطلع من الغرفة
رأفت:وين رايحة تعي كملي شغل
الجزء السابع:
الجزء السابع:
طلعت من الغرفة و ما رديت عليه ابدا ، نزلت على غرفتي و انزويت على حالي ،اجت اميمة كالعادة لتقلي يلا قومي كملي الشغل يلا ما بيخلص ،سبقتني على المطبخ و لحقتا بعد ما مسحت دموعي
سارة:اميمة بدي اسألك ليش بغرفتي ما في مي سخنة ،تحممت اليوم بمي باردة
اميمة:الست ازدهار عاملة تمديدات هالغرفة لحاالا
سارة:طيب يعني ما في سخان عندي
اميمة:لا ما في
سارة:طيب بدي اتحمم بمي باردة يعني ،انت وين بتتحممي ؟
اميمة:بالحمام الرئيسي
سارة:اي خلص بصير اتحمم فيه
اميمة:لااا ما بقدر خليكي ،الست ازدهار نبهتني انو ما تتحممي الا بحمام غرفتك
سارة:شو يعني؟بدي ضل اتحمم بالمي الباردة و البرد عم يقسى كتير و ما في بغرفتي ولا وسيلة تدفئة غير هالحرام الرقيق و عم ابرد بالليل ،حتى تيابي السماك اخدتلي اياهن ،بدا تموتني على البطيئ
اميمة : سارة ولله بعرف انك عم تتحملي شي فوق طاقتك بس انا شقفة خدامة مأمورة شو طالع بأيدي اعمل غير انو نفذ الاوامر بس رح اعطيكي حرام من عندي بس بدك تفيقي الصبح بدك تخبيه منيح حتى ما تشوفو عندك و الا باكلا انا
سارة:...طيب
اميمة :قولي هاليومين الست ازدهار نازلة عند اهلا بالبلد بتقضي يومين و بترجع
سارة:عنجد يا اللله ولله فرحتيني و اخدة ابنا معا
اميمة:لا ما بتاخدو لانو عندو شغل هون بس يمكن هالمرة تاخدو بما انو انت موجودة هون
سارة:انشالله يا رب
بلشت ارسم خطط لاهرب من هون ،بلشت اميمة بتجهيز الغدا و انا ساعدتا ،كنت متفائلة و مبسوطة على غير عادتي لاول مرة ، على الساعة 3بلشت انقل الاكل على الطاولة ،كانت ريحة الرز بالبازيلا بتشهي كتير ،حطيت الاكل بسرعة و رجعت على المطبخ
سارة:ميتة من الجوع ،اعطيني صحن
وقفت فوق الطنجرة و لقيتا شبه فاضية
سارة:ليش حطيتين كلن ،و انا ميتة من الجوع بدي انطر هلأ ليخلصو لاكل
اميمة:ناطرة متلي متلك
سارة:مستحيل بطني عم يجعني
اخدت الصحن و المعلقة و اطلعت برا ،مديت راسي شوي و ما شفت الست ازدهار و لا رأفت قاعدين على الطاولة ،مشيت على روس اصابيعي و بلشت اسكب على صحني
رأفت:شو عم تعملي ؟
رفعت راسي لفوق و شفت رأفت واقف على درابزون غرفتو المطلة على الصالون
سارة(تأتأ) :ااااانا ...عم ....قيم من الصحن المليان لانو حسيت انو اميمة معبيتو زيادة عن اللزوم ..
نزل على الدرج هو و عم يطلع فيني
رأفت:كذابة و ما بتعرفي تكذبي ،هيدا الصحن الك عم تعبيه لتاكليه
سارة:صح عم عبي الي
قرب مني و سحب الصحن من ايدي
رأفت:انت بتحب الرز بالبازيلا؟
سارة:عادي باكلا يعني
مسك الصحن و قلب الاكل يلي فيه على الارض
رأفت(يبتسم): لمين من عن الارض و كلين
سارة: هيك صار اكل كلاب ،جيب امك و تعو كلون ...
ضربني كف و حملني على ضهرو و اخدني على غرفتي و بلش يضرب فيني و يسبني
رأفت:نحن كلاب يا حيوانة يا حشرة
ركضت اميمة على صوت الضرب
اميمة:سيد رأفت طول بالك
رأفت:انت اخرسي و اطلعي لبرا
مسكا لاميمة من ايدا و دفشا برا الغرفة و سكر الباب ،انا ركضت على الحمام و قفلت الباب ،دفش الباب الخشب برجلو و رجع مسكني من شعري
سارة:انا الكلبة انا الكلبة
رأفت:اي انت الكلبة
مسكني من شعري و طلعني من غرفتي و اخدني على الصالون ،كانت ازدهار قاعدة عم تاكل باعصاب باردة و كأنو ما سامعة شي ،مسكني من شعري و وطى راسي على الارض
رأفت:يلا لشوف مين الكلب فينا ،لمين و كلين
سارة:ما رح اكلن ،ما باكل شي من الارض
ازدهار:يا روحي يا ماما خلص روق شوف كيف صار وجهك احمر ...اميمة تعي خدي هالكلبة من وجهي و عقاب الها ما في الها غدا او عشا ،زتيا بالغرفة و قفلي عليها الباب
ركضت اميمة و اخدتني من تحت ايدين رأفت ، فتت على غرفتي و قفلت علي الباب و راحت ،و انا بقيت بالتخت ابكي و اتوجع لصارت الساعة تسعة و نص ،فتحتلي الباب اميمة و فاتت على الساكت
اميمة:قومي جبتلك اكل ،كلين بسرعة و برجع بعد شوي باخد الصحون منك
سارة:ما الي نفس خدين معك
اميمة:قومي يلا بكرا رايحة الست ازدهار و رح ترتاحي يومين ...يلا كلين
جلست على التخت و بلشت بصحن الشوربة ، كان جسمي عم يجعني كتير و كنت عم انحف يوم عن يوم و اتلاشى ،اكلت و رجعت نمت ،فقت تاني يوم على حركة اميمة عندي بالغرفة
سارة:راحت
اميمة:اي طلعت من الستة الصبح
سارة: و الخفاش وينو ؟
اميمة : هلأ اجا عم يتحمم بدي روح حطلو فطور
سارة:ياللله اديش هاليوم حلو و مريح انا رح ارجع حط راسي ونام
اميمة:طيب
...................................يتبع