السلام عليكم يا زهراتى
انا النهاردة حابه ادردش معاكو
بصوا يا حبيباتى
انا دلوقتى كنت بتمنى انى اعرف حاجات كتير جدا قبل ما اكبر شويه و انى و مقعش فى غلطات كتير علشان حياتى متبقاش فيها مشاكل عموما سواء فى حياه او اصدقاء او دراسه او اى حاجه ليها علاقه ب حياتى ..
✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿
اولا لازم تعرفوا ان حياتكوا هتعيشوها مرة واحده بس ف اتعلموا من غلطكوا و عيشوا حياتكوا صح
1_قربى من ربنا هيكرمك كرم واسع جداا جدااا و الجأى لربنا و بس فى كل وقت اياً كان ضيق او فرح
✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿
2- لازم تبعدى عن صحابك البائسين يعنى ايه بائسين , يعنلا معندهمش امل فى بكره يا بنات بجد انكوا تصاحبوا واحده متفائله و نشيطه و طموحه دى هتخليكى زيها , لكن انك تعرفى واحده محبطه و بتشتكى دايما دا هيأثر عليكى . و لو مأثرش عليكى دلوقتى يبقى هيأثر فيما بعد عليكى .. الحل الامثل لو ليكى حد من صحابك كدا . انك تسمعى اللى بيضايقهم و حاولى انك تحوليه ل طاقه ايجابيه ليكى انت
بمعنى ايه ؟!
مثلا واحده من صحباتك جت و قالتلك انا مش عارفه اذاكر و بجد المذاكره كترت عليا و و و و شكوى فى شكوى
انت انصحيها و اعملى اللى عليكى بس احتكاكك بيها يخف شويه
و تحوليه ل طاقه ايجابيه ب انك تقولى ل نفسك مثلا : دى بتكون نتيجه قله المذاكره انى اندم علشان كدا انا مش هغلط غلطه صاحبتى دى و هذاكر و دا يكون حافز ليكى انت
✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿
3_ مش هقولك بقا ذاكرى اول ب أول و انك لازم تستحملى هم المذاكره. انا كنت من اوائل الناس اللى بتمسع النصيحه دى و اقول حاضر و هعمل كدا و بكسل جدا بعد 5 دقايق مذاكره cool
انا بس هقولك ان دا مستقبلك انت , مينفعش اصلاااا ان اى حد فى الدنيا يقولك ذاكرى
انا من اكتر الكلمات اللى بتجننى ان حد يقولى ذاكرى .. بتحسسنى ان فى حد خايف عليا اكتر من نفسى و دا استحاله يحصل يا بنات غير لو مامتكم اللى قالت تبقى خايفه فعلا عليكى لكن بردو محدش هيخاف على مستقبلك قدك انت و بس ,, الكلام دا مهم جدا يا بنات . مستقبلك هو سلاحك و مذاكرتك بتحدد جزء كبير من مستقبلك
✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿
4_لازم يكون ليكى هوايه .. بجد من اكتر الحاجات اللى هتفيدك بعد كدا هى هوايتك
نفترض ان انت مثلا بتحبى جدا جدا الديكور
بس دخلتى كليه تانيه خالص ,, حقوق مثلا
دى مش هتكون نهايه طريقك بالعكس
هتدرسى قانون و تاخدى بعد كدا كورسات فى الهوايه بتاعتك و تنميها لحد ما توصلى للى انت عايزاه فى هوايتك دى
✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿
5_ بصوا يا بنات .. فى علاقتكوا مع الناس . او اى حد فى الدنيا كلها بجد . اتعاملوا بسطحيه .. خليكى غامضه شويه
بمعنى انك تتعاملى باللى جواكى عادى , طيبه و متواضعه و محترمه و مبتسمهو كيوت كدا و كل حاجه حلوه فيكى
بس متصاحبيش كل اللى تعرفيه . الكلام يكون فيه حدود مع اى حد فى الدنيا . علشان لو عملتى غير كدا هياخدوا عليكى و انت لازم يكون ليكى كيان و ناس من حواليكى محترماكى
دى مش مثاليه يا بنات
او تكونى انسان آلى لأ بالعكس
انت هتبقى براحتك و بتتكلمى بضحك و هزار زى ما بتحبى بس بحدووود و مش فى كل وقت .. فى الوقت اللى يستدعى الضحك بس
✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿
6_نتكلم بقا عن الصحاب شويه smiley بصوا يا زهرات انا اه مش كبيره اوى بس انا اجتماعيه جدا و عرفت ناس كتير جدا جدا و طباع مختلفه بشده
و من خلال الفتره اللى احتكيت بيها مع ناس مختلفه انا اتعلمت حاجه . والله من اهم الحاجات اللى بحمد ربى انى اتعلمتها
و هى انى أكون ( مستمعه جيده جدا جدا )
ممكن نتكلم بشرح شويه فى الموضوع دا ؟
يعنى انت مثلا ليكى صحاب و قاعده بينهم و كله بيتكلم عن اى حاجه واحده مثلا بتتكلم عن مشاكلها فى البيت و التانيه عن انها مقصره فى الصلاه و العباده و التالته بتقول فى نقط ضعفها و انها ضعبفه و مش قويه فى قراراتها
اسمعى كله و انصتى بحرص و اللى تسمعيه تحافظى عليه متبقيش تسمعى الكلام و تنقليه . حرام اولا ثانيا هيتردلك
المهم و انت فى القاعده دى انصحيهم و خليكى سند و صاحبه نصوحه لكن انت اياك انك تتكلمى عن مشاكل عندك مع حد او عن نقط ضعفك مع حد او عن احلامك مع حد
يا بنات دى بجد مشكله انك تحكى كمان اسرار بيتك مع اى حد فى الكون
و ياما بتحصل مشاكل فظيعه بسبب الموضوع دا
ف حافظى على نفسك و اهلك و خليهم فى احسن صوره حتى لو هما مش كويسين معاكى
حلى مشاكلك بنفسك و الجأى لربنا ثم اهلك
غير كدا اتكلمى فى كلام عام جدا و عادى و اضحكى و هزرى و احكى مواقف عاديه براحتك
يا ريت بجد تاخدوا بالكوا من النقطه دى
✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿
7_ خليكى كويسه مع الناس . بجد خلى اللى يشوفك يفرح انه شافك و يتعلم منك
✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿
8_احلامك خليها بينك و بين نفسك متقوليهاش لأى حد عليه . الاحلام و الطموحات لما بتتقال كتير مبتتحققش ,, نفسك تشاركيها مع حد علشان يشجعك يبقى اختك او والدتك و مع نفسك دايما فكرى نفسك بحلمك غير كدا ملوش داعى
✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿
9_ اياكى ثم اياكى ثم اياكى و النميمه و الكلام عن حد
بصوا انا و غيرى شوفنا كتير من الكلام نقل الكلام
تبقى واحده قاعده معاكى و متكلمه عن واحده و بتحسدها قدامك و انت مصدومه من انها ازاى بتقولك كدا عن اقرب واحده ليها و لما بتشوفها بيبقوا اقرب اتنين ل بعض
بجد اسمعى و قولى كلام كويس و امنعى انها تتكلم عن الناس و فهميها اننا بشر و كله بيغلط و اسكتى
✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿
10_ حاجه مهمه اوى انك بلاش تعودى نفسك على شتايم . انت انثى . ربنا خلاكى انثى جميله . يبقى ازاى انت تخلى لسانك وحش
خليكى هاديه و رقيقه و لسانك يطلع كلام كويس دايما و اتعلمى انك تكونى حتى فى حركاتك رقيقه لحد ما طبعك اصلا يبقى رقيق و هادى بالتعود
لكن انا اعرف ناس صوتها اعلى من منبه موبايلى بجد و الشتايم دى اسهل حاجه على لسانهم و حركاتهم رجوليه كدا و كلامهم ياسطى و زميلى و باشا هههههههههههه
انا لما بقولها بقولها بداعى الهزار اوى مع صاحبتى يعنى اقولها وحشتينى يا زميلتى و نضحك
لكن فى ناس بيكون دا اسلوبهم بجد .. مش متخيله ازاى هما من نوع الانثى
✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿
دى اكتر حاجات و اقواها اتعلمتها و حبيت انى اقولهالكوا
انا لو هطلب حاجه هطلب انكوا تدعولى يا زهراتى دعوه حلوه من قلبكوا كدا ان ربنا يحققلى اللى بتمناه
و ميمنعش تقييم حلو بردو لو الموضوع يستاهل
سلام يا جميلات ^_^