السلام عليكم
شوفوا بقي ياقمرات ، كل واحدة مننا بتدور وصفه ناجحه للكيك وخاصة الكيك الاسفنجيه ، لان بيبقي فيه مناسبات كتير عندنا طيب ايه اكتر وصفه سهله وبسيطه وفي نفس الوقت ناجحه للكيك الاسفنجيه ، اللي ممكن نعمل منها تورته أو جاتوه وتبقي زى الجاهز بالظبط
انا هقلكوا علي وصفه سهله وبسيطه وناجحه ١٠٠ ٪
تمام الوصفه دى عملتها اكتر من مره وماشاء الله مافشلتش ولا مره واحده ، ومش بتاخد وقت
اتمنى اللي هتنقلها تذكر المنتدى عشان كده هتلاقي سرقه لمجهودي والوصفه مش منقوله من اى منتدى تانى
صلوا على النبي ويالا نبتدى
--------------------------------------------
المقادير للكيك الاسفنجيه
250 جرام دقيق منخول 3 مرات الدقيق اسمه ⬅( الجمل )
25 جرام نشا
200 جرام سكر عادي
50 جرام محسن كيك جل
6 بيض
1/2 كيس بكنج بودر شيف
4/3 كوب ماء بثلج
نص ملعقه صغيره فانيليا سائله أو 4 كيس فانيليا
--------------------------------
طريقه تحضير الكيك
نضع كل المكونات في إناء عميق ونضرب بمضرب البيض
هتبتدي تجمد معانا علي طول شايفين ⬆⬆⬆
هتفضل نضرب لمده من 10 دقائق الي 15 دقيقة لحد اللون مايبقي فاتح
هنصب الخليط من مقاس 24الي 28 يعنى الارتفاع اللي تحبيه انا عملتها في قالب مقاسه 28
طلعت معايا 3 طبقات
في الفرن الساخن على درجة حرارة 180 لمده من 40 الي 50 دقيقة
ملحوظه هامه :، الكيك الاسفنجيه دى مش هنشربها أو نسقيها اى حاجه لان احنا حطينها ثلاث ارباع كوب ماء وده بيخليها طريه طيب لو حطينا نص كوب ماء بس هتكون ناشفه وبكده هنسقيها شربات خفيف جدا
،----------------------------------------------
نصائح لكيك ناجح من مطبخ منه
الدقيق لازم يكون نوعه حلويات عشان تطلع حلوه لو الدقيق مش للحلويات هتطلع سمرا او مش هتنفش معاكى ، هتكون مكتومه ، طعمها مش حلو ، ايون حقيقة الدقيق بيفرق كتيييييير
٢_ الفرن نشغله قبل ما نحط الدقيق مع باقي الخليط أن سخنتيه قوى في الاول الكيك مش هياخد الارتفاع العالي لأنه هياخد صدمه من السخونه اللي دخلها مره واحده
٣_ ناس كتير بتدهن القالب زيت ورشه دقيق أو يجيبوا مخصوص قالب كيك مش بيازق فيه وبيبقي غالي وناس كتير مش بتعرف تجيبه انا عاوزه اقولكم بقي سر عارفين السمنه النباتى
اه اللي هى منتشرة كتير هاتيها وفي القاع معلقه كبيره وغلفي بيها القالب
مش هيلزق نهائي
٤ _ اوعى تفتحى الفرن قبل نص ساعه او هتعملى الكميه دى كلها
لو نص الكميه بعد نص ساعه او ٤٠ دقيقة هتكون استوت
هتعرفي منين بخله سنان دخليها في الوسط أن طلعت نضيفه يبقي استوت
وأما تستوى الكيك افتحي باب الفرن حبه صغيره وسيبيها جوه خمسه
لو خرجت من السخن للبارد هتهبط
٥_ الخل بيضيع اي روائح مش حلوه للبيض ، وبيخلى الكيك ينفش معاكى جربوه في البان كيك وادعولى