محتاره ومش عارفه اعمل ايه

بصى يا جميل انا وجوزى مرت علينا ظروف اقوى من كده انتى خايفه من الزمن وانا معاكى انا بعت دهبى كله شبكتى ودهبى قبل الجواز ومش عشان مشروع كان عشان ناخد شقه نقعد فيها وكان معايا اولاد كمان وقتها بس الحمد لله من بعدها اولا كبرت فى عين جوزى قوى وربنا فتحها علينا من وسع وعوضنى باحسن من اللى بعته اوقفى مع جوزك وساعديه مش بس بالدهب باى حاجه حتى لو تساعديه بمجهودك فى المشروع نفسه وربنا اللى بيرزق ممكن يكون معاكى الدهب لكن برضه ييجى عليكى الزمن الضيقه مش بس فلوس ربنا يكرمكم وترتاحوا ويوفقكم فى حياتكم واولادكم

[font=""][color=""][size=""]السلام عليكم ورحمة الله وبركاته
زى العنوان ما بيقول محتاره ومش عارفه اعمل ايه
انا متجوزه وعندى بنتين وولد وللاسف الشديد ساكنه فى بيت عيله والناس اللى فيه (حماتى واخوات جوزى بيكرهونى ومش بيتمنولى الخير)
وجوزى شغال مع والده بس والده بيعامله زيه زى الغريب بمعنى انه بيديله مرتبه ولا زياده ولا نقصان وللاسف الشديد ان المرتب ده لا يكفينا وفى معظم الاوقات جوزى بيستلف من والده ويرجع يسدله بعد ما يقبض وطبعا مش هينفع يشتغل بره لأنه الابن الوحيد بس خلاص مبقاش ينفع فضل مضغوط لحد ما زهق من المعامله دى وقرر انه يسيب لابوه الشغل ويفكر فى مشروع لنفسه خاص بينا وفعلا ابتدا يمشى فى موضوع المشروع ده بس المشكله دلوقتى انه هيحتاج مبلغ معين يبدأ بيه وهو مش عاوز يدخل معانا شريك عشان مشاكل الشراكه فعرض عليا ابيع دهبى كله (عباره عن غويشه وسلسله وخاتم ومحبس ) مع العلم انى كان معايا 3 غوايش وبعت منهم 2 ليه برضه وفضل الاخيره مع باقى حاجتى وعلى فكره الخاتم والسلسله بتوعى انا مش تبع شبكتى
المهم انا حاولت اقوله يتصرف من حد تانى لأنى خايفه ابيع الحاجه كلها وهو قاللى ان محدش هيرضى يديله المبلغ ده وقاللى كمان ان هياخد تمن الذهب وهيحاول يستلف عليه المبلغ اللى فاضل
فانا دلوقتى خايفه ابيع الدهب كله ويبقى مش معايا حاجه للزمن وارجع اقول ياريت اللى جرى ما كان
وخايفه كمان مشروعه لا قدر الله يفشل ويبقى معملناش حاجه غير انى فرطت فى حاجتى وخلاص
وكمان ممكن حماتى ووبناتها يفكرو انى مقوياه عليهم وعايزاه يسيب والده مع ان ده عكس الحقيقه وربنا اللى عالم
على فكره انا مش بفكر فى الدهب عشان اتعايق بيه لا خالص انا مش لابساه اصلا انا بس كل الحكايه انى شايلاه للزمن والازمات وخايفه اخسر اخر كرت معايا
وكل ده كوم وانى اكسر فرحة جوزى واحطم معنوياته ومديلوش الفلوس اللى محتاجها بعد ما قاللى ان نفسه اتفتحت للدنيا وللشغل كوم تانى
بجد مبقتش عارفه اعمل ايه ياريت تدلونى عالحل لو سمحتو وتدعولى ربنا يهدينى للحل وييسرله شغله
واسفه للاطاله[/size][/color][/font]