أو

الدخول بواسطة حسابك بمواقع التواصل

#1

افتراضي كائنات فضائية فى بيت الست ذكية القصة الأصلية حصريا على عدلات بقلمى

انا مش عارف امتة ربنا يتوب علينا من البيت المهكع دا اللى ساندينوا بعود كبريت
- ياخويا... أحمّد ربنا البيت ..دا هو اللى اتربيت فيه وشاف قرفك طول السنين يا حزين
-بقولك اسكتى انتى يا ذكية احسن انتى فرسانى بكلامك اللى كله تفاؤل ده .
- هو فيه احسن من التفاؤل يا واد ده التفاؤل بيخلى العيشة حلوة وحياتنا ليها طعم يالا علشان تفطر
- يييييه ادى المية انقطعت والصابون على وشى
-طب متتنرفزش اوى كدا انا هجيبلك مية واصب عليك اهو اشطف وشك يابن جميل اشطف
-يالا احسن الفول هيبرد
- ميبرد محسسانى ان الكباب هيبرد
-ههههه مهو دا كباب الغلابا يا اهبل وبعدين احمد ربنا... دى كل نعمة ربنا حلوة
-اصحى يا صبا يابنتى الساعة بقت سبعة ونص
قوم يا حسين احسن تتأخر على كليتك يالا يا هبة قومى يا بنتى اصحوا بقى يا ولاد متدوخنيش
-صباح الخير يا امى
- يسعدك صباحك يا حسين
- يا ستى احنا صاحيين من بدرى وانتى نايمة بس كنا بنصلى الصبح جماعة حيث اننا اتأخرنا فى النوم والفجر فاتنا النهاردة
- صباح الخير يا مامتى
-صباح الفل يا صبا يا حبيبتى
-صباح الخير عليكم جميعا
- صباح الخير يا هبهوبة
-ايه يا حسن مالك مبتردش الصباح ليه
- اصلكوا بقالكوا ساعة بتصبحوا وانا هرد على مين والا مين دا شىء متعب جدا لو رديت عليكوا واحد واحد هزهق ومش هعرف اكل
- يا ساتر يا رب هو انت كل شىء عندك بحساب حتى رد السلام
- سيبكوا منه دا دايما كاره عيشتنا ومش عاجبه حالنا يا بنى احمد ربنا واشكره على نعمته
- الحمدلله يا ستى مقلناش حاجة بس يعنى نفسى احس بأنتعاش فى البيت دا
- انتعاش ازاى يعنى اجيبلك لبان نعناع والا انعشك ازاى
- انتى بتتريقى ياما
- لا والله بتكلم جد يا سى حسن طبعا بتريق هو فيه اغبى منك اتريق عليه ..مانت لو عاقل زى بقيت اخواتك مكنتش اتريقت ولا فتحت بقى معاك
- انت اصلا مش عارف انت عايز ايه فى الدنيا دى
- نقطينا بسكاتك يا ست صبا مبقاش الا انتى اللى تتكلمى
- ومالى ان شاء الله
- مناخيرك طويلة وخسارة فيكى الأسم انتى يا بنتى مبتبصيش فى المرايا والا ايه
-ربنا يسامحك خلقة ربنا يا بارد شايفة ياما
ابنك بيتريق على مناخيرى ازاى
( صبا طلعت تجرى تبكى فى اوضيتها)
-ليه كدا بس يا بنى احنا مصدقنا انها تنسى الموضوع دا وتعيش حياتها زى اى بنت فى سنها
- تصدق يا حسن انت انسان معندكش احساس
- سبنالكم انتوا الأحساس ايه يا ست هبة مالك مبتتكلميش ليه شاطرة بس تبوصيلى بأرف
وخلاص
- عايزنى اقولك ايه انا مش فاضية لمشاكلكم التافهة دى انا ورايا شغل
- شغل بتسمى محل الجزم اللى انتى شغالة فيه ده شغل
- هو انا لقيت غير كدا ومشتغلتش يا فالح
- وانت هتلاقى احسن من كدا ايه يا ام دبلوم انتى
- اسم الله عليك يا ساقط اعدادية انت مش احسن مقعد طول النهار اذوق فى نفسى والبس توب مش توبى والف اضحك على عقول البنات وافهمهم انى الواد اللارج جتك خيبة بالويبة بنى ادم مش حاسس بروحه
- وانتى مالك يا رزلة اعمل ايه اذا كانت البنات بتموت فيه وبتتهبل علية
- اه انت شكلك امور ويغر بس افرض عرفوا حقيقتك موقفك هيبقى ايه يا فالح
-وايه اللى هيعرفهم ان شاء الله
- الأمر ميسلمش
( دخلت هبة لصبا )
-انا ماشية يا اما يلا يابت يا صبا على مدرستك وسيبك منه دا واد فاشل اصلا خليكى واثقة فى نفسك يا عبيطة وزى ما اتفقنا البنى ادم بعلمه واخلاقه مش بشكله ايه يعنى مناخيرك طويلة شوية دى مجرد عضمة زايدة مش احسن متبقى عمية او عاجزة او فاقدة اى جزء من جسمك احمدى ربنا والله انتى جميلة بروحك واخلاقك
- ربنا يكملك بعقلك يا هبة يا بنتى ويرزقك بابن الحلال اللى يستهلك
( الباب بيخبط)
-قومى بقى يا صبا بلاش دلع الظاهر دى راندا وغادة جاينلك علشان ترحوا المدرسة سوا كالعادة
- خليكى يا امى انا هفتح لهم
-صباح الخير يا حسين صباح النور يا راندا
ازيك يا غادة
-( بخجل )
- صباح الخير يا حسين
- متتفضلوا اتفضلى يا غادة
- معلش اصلنا متأخريين
- طب عن اذنك يا حسين انا هدخل استعجل صبا
-ازيك يا غادة ..عاملة ايه
- انا الحمدلله انت عامل ايه واخبار الكلية ايه
- انا تمام والكلية حلوة ..حلوة اوى اوى اوى
( بتضحك وعنيها فى الأرض من الكسوف)
-الله متدخلى يا غادة ايه يا حسين مالك موقفها ع الباب كدا ليه اتفضلى يا غادة
- متشكرة جدا انا هنزل استناهم قصاد باب البيت




- ليه يا بنتى احنا هناكلك
- معلش عن اذنك يا حسين
-اتفضلى وانا دقيقة وهخليهم يحصلوكى
( بعد مانزلت غادة بص حسين لحسن بغيظ)
- تصدق انك قليل الذوق ازاى تحرج غادة بالشكل دا انت مش هتبطل رخامتك دى يا اخى
- انا قلتلها حاجة ال يعنى البت اتكسفت اوى هو عاد فيه من الأصناف دى فى الزمن دا مبحبش التمثيل الأوفر دا
- تصدق انت خسارة الكلام معاك
- يااااه دا كله علشان حبيبة القلب
-انت بنى ادم انت اعوذ بالله ...صبا يا صبا غادة مستنياكوم تحت قدام باب البيت يالا علشان متسيبوهاش واقفة لوحدها فى الشارع كدا
- حاضر يا حسين احنا نازلين حالا
-هو اخوكى دا طوبة ليه كدا ساب البت تنزل ومفكرش حتى ينزل وراها
- حسين مؤدب ملوش فى الكلام دا
لو حسن اقولك يعملها لكن حسين عمره هههههه
-طب عن اذنك يا طنط
- احنا نازلين يا ماما
- مع الف سلامة يا حبايبى ربنا معاكوا
- وانا تعوزى حاجة منى يا امى
- عايزة سلامتك يا حسين
- وانا كمان نازلة اصلى اتأخرت ع المحل يا ما
- مع السلامة يا هبة
ربنا يصلحلك حالك يا بنتى
-مفضلش غيرى انا وانت يا زيكوا يا قمر
-عايز كام يا حسن م الأخر
- يعنى خمسناية
-ايه خمس ايه خمسناية ايه يا بنى انت فاكرنى بجيب م البير والا ايه هما جوز جينهات عاجبك والا اعنهم فى الأمانات
- لا امانات ايه يا زيكا يا مزيكا
هاتى وامرى لله..وحياتك بكرة لتروق وتحلى بس اصبرى
سلام
- مع السلامة ربنا يهديك يا حسن يابن ذكية قادر يا كريم
-اه م الحق يا زيكا امال الحاج جميل فين
- ابوك دا نزل م الفجر يا ابنى يسعى على رزقه ربنا معاه
- هو مش هيرحم نفسه من شغلانة البواب دى
- وماله البواب يا سى حسن جربة والا جربة الحمدلله لا بيسرق ولا بيشحت
- طب بس بس انتى هتفتحيلى موشح دى مكنتش كلمة قولتها
سلام
( نزل حسن والبيت فضى على ذكيه سمعت صوت غريب بيقولها)


#2

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى

الحلقة التانية
( مش عاجبهم البيت دول اكيد اتجننوا طب دا عاجبنا جدا)
اتخضت الست زكيةوقالت
- بسم الله الرحمن الرحيم...سلام قولا من رب رحيم ..مين اللى بيتكلم ...مين هنا وبيتكلم...سى جميل انت هنا ...طب واد يا حسن انت هنا وعامل فيا فصل
(ذكية ركابها سابت وندهت على تفيدة جارتها
من بير السلم....تفيدة يا تفيدة يا ام راندة
- ايوة يا ذكيه يا اختى ..فيه حاجة والا ايه
-اطلعيلى قوام
-من عنية هجيب المفتاح واجى
(طلعت الست تفيدة تجرى اتحشرت فى باب الشقة
- يا لهوى الحقينى يا ذكية افتحى دلفة الباب التانية الا اتحشرت
- حاضر يا ختى
- بتندهى علية طب اعملى حسابك وافتحى الباب ع الدلفتين انتى مش عارفة ان طالعلك الديناصور ههههه
مالك يا ختى خضتينى
- اقعدى يا تفيدة يا ختى بس استنى هحطلك الخددية ع الأرض لحسن الكنبة تاخدك وتنزل تقعى تعملى زلزال فى البيت اللى على رأى حسن ابنى مسنود بعود كبريت
- طيب مالك بقى يا ذكية مرعوبة وعاملة زى الموبايل الفيبريشة كدةليه
- اسكتى يا تفيدة يا ختى انا بينى وبينك زى ما كون حاسة كدا ان البيت فيه اللهم احفظنا
( تفيدة بتحصن نفسها
- حابس حابس قافل كابس اكفينا شرهم يا رب ..ايه يا ختى اللى انتى بتقوليه دا
- والله ياختى مبكذب عليكى ساعات اقفل الشباك يتفتح معرفش ازاى اشك فى نفسى واقول اكيد انا نسيت اتربسه وساعات ابقى واقفة فى المطبخ ومفيش ولا نسمة هوا تهز ورقة شجر ابص الالقى زى ريح عدت من قدامى وكله كوم واللى جرالى النهاردة كوم تانى
- ايه اللى حصل يا ختى احكيلى
- سمعت صوت بيكلمنى
- يا لهوتى بيكلمك ازاى
- اى والله يا ختى بعد ما حسن ابنى نزل لقيت صوت بيقولى (مش عاجبهم البيت دول اكيد اتجننوا طب دا عاجبنا جدا)
-ههههههه يا سلام والنبى انتى باين عليكى اتهبلتى يا ذكيه قال البيت عاجبهم قال ههههههه
وفجأة سمعت صوت
( بتضحكى على ايه يا تفيدة يا تخينة)
يالهوى ايه دا يا ذكية دا باينه حقيقى انا سمعت حد بيقولى يا تفيدة يا تخينة دى مش حكاية سمع بس لا دا كمان شيفنا
هاتى ايدك قومينى ياختى عايزة انزل
- يا ولية اجمدى كدا وقومى براحتك ال اقومك دانتى عايزالك بلدوزر
- لالالالالا انا مش حمل كدا ابدا انتى واحدة قلبك جامد انما انا قلبى خفيف مقدرش استحمل
- استغفر الله العظيم ال جبتك يا عبد المعين تعنى لقيتك يا عبد المعين عايز تريلا تقومك
-لا يا ختى انا جتتى مش خالصة انا نازلة اقفلى الباب ورايا
- لا حول الله يا ربى
- ايه انتى مش خايفة يا ذكية والا ايه
- لا خلاص ما يصيبك الا نصيبك
لكن قلى يا للى بتتكلم انت عايز منى ايه
-بعدين هتعرفى يا ذكيه
- طب واشمعنى بيتى بالذات اللى عاجبك
- تقصدى عاجبنا
- يا لهوى انتوا جيش والا ايه
-يعنى بس مش البيت اللى عاجبنا
- امال ايه
- انتى ياست ذكية اللى ست طيبة واحنا نفسنا نساعدك لأنك ست بسيطة وطيبة ومتدهولة كدا ولا عارفة تصدى ولا تردى مع ولادك وحاسين انك محتاجة مساعدتنا
- مش فاهمة تقصد قصدى تقصدوا ايه
- بعدين نقولك روحى افتحى الباب الحاج جميل راجع زعلان
-بس معنتيش تقولى لحد علينا لحسن نمشى ونسيبك تايهة من غير مانساعدك
حاضر يا الا انادى اقول ايه
- عينى اندهى وقولى يا عينى
- اتفقنا يا سى عينى00ام اروح افتح الباب
- سى جميل مالك يا جميل
- ابدا يا ذكيه تعبان شوية استأذنت الأستاذ وجيه وقالى روح استريح فى بيتك النهاردة ومتجيش الا لما تخف
- والنبى راجل امير وطول عمره كريم وابن حلال
-ادخل يا خويا جلبيتك متعلقة وفرشتك متوضبة وانا كلها نص ساعة ويكون الغدا جاهز
- طب اعمليلى كوباية شاى بلمون اشربها واريح شويا
- من عنية يا سى جميل
( ذكية راحت تعمل الشاى باللمون لقته جاهز ع الرخامة فى المطبخ اتخضت وقالت بسم الله الرحمن الرحيم الشاى دا اتعمل امتى الظاهر انى تعبانة وبنسى يا عينى
- ايوة عايزة حاجة تانية يا ست ذكية
- لا هو انا ندهتلكوا
- انتى مش قلتى يا عينى
- ها اه يادى النيلة دانا كنت بكلم نفسى انما قولولى مين اللى عمل الشاى باللمون
- انا يا ستى سمعت عم جميل ببقولك اعملى شاى بلمون قلت اعملهولك
- والله كتر خيركوا يا حبايبى
ام اروح اوديله الشاى
- الشاى باللمون يا سى جميل
- ايه السرعة دى اد كدا خايفة علية يا ذكيه
- ها امال يا خويا لو مكنتش اخاف عليك هخاف على مين
- طب ما تيجى تريحى جنبى شوية
- ها..لالالالالا مينفعش يا سى جميل مينفعش ابدا
- ليه بس
- يشوفونا
- بتقولى ايه
- بقول انا سايبة الأكل ع البوتاجاز
( وجريت من جنب عمى جميل ع المطبخ وهى بتقول لنفسها
كدا مش هينفع بقى عندنا ضيوف البيت مستدمين اعمل ايه
وفضلت تفكر فى حل
يا ترى ايه حل المشكلة العويصة دى

#3

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى

الحلقة الثالثة
-ام ادخل اعمل الغدا وافكر وانا بطبخ اعمل ايه فى المصيبة دى الموضوع دا لازم اتكلم معاهم فيه
(ذكية اتسحبت وبصت على جوزها لقته بيشرب الشاى وهو مستغطى فى السرير واول ما سمعته ببشفط شفطة الشاى من معميعوا اتخضت وقالت
- بالذمة دى شفطة واحد عيان امال لو مش عيان كان لم علينا الجيران
دى مصيبة ايه دى
ام اروح اكمل طبيخ
( دخلت ذكية المطبخ )
- اعمل اكل ايه ام ابص فى التلاجة اشوف ايه اللى ينفع يتطبخ
كوسة -سبانخ - بسلة - فاصوليا خضرا
-خلاص يبقى ادبح لهم بطاطس النهاردة وخلاص
لكن ابو حسين عيان ادبحله بطاطس ازاى
خلاص امرى لله اكسر الروتين واعمل سبانخ ورز واطلع كيس اللحمة اللى كنت هعمله يوم الأجازة واعمله لجل مايروح التعب اللى عنده اصله مهما يكون سنه كبير ومحتاج غذا يا عينى
-طلبتينا يا ست ذكية
- ( ذكيةاتخضت وتفت فى عبها)
- لالالالا بقولكم ايه انتوا هدنكوا حوليا كدا فى كل حتة فى الشقة مش هينفع دا حتى وحش على صحتى هتنزلولى البواسير
- احنا عمالنالك حاجة امال لو ظهرنا لك بقى كنتى عملتى ايه
-اهو دا اللى ناقص
بقولكم ايه انتو كام واحد
-ليه ناوية تغدينا
- الأكل ميغلاش عليكم بس اللى اقصده انى اعرف عندى كام ضيف فى البيت بالضبط وحريم والا رجالة
-احنا 6 يا ست ذكية 4 حريم و2 رجالة
- 2 رجالة و4 حريم طب كويس
- انتى قلقانة من ايه يا ست ذكية كونى صريحة
- انا لالالالا ابدا يا لهوى انا كدا هتأخر على عمايل الغدا عن اذنكوا
-ايه دا السبانخ اتطبخت واللحمة بتتسلق والرز اتعمل طب ازاى
- دى حاجة بسيطة يا ست ذكية احنا عارفين ان شغلك كتير وانتى صعبانة علينا بتتعبى اوى
- ربنا يكرمكم يا رب
- ذكية انتى بتكلمى مين يا ذكية
- ابدا مكلمتش حد انت بتحلم والا ايه يا جميل
- مش عارف زى ما يكون سمعتك بتكلمى حد
- اه هههههه دانا كنت بدندن وانا بطبخ بقول يا جميل ياجميل يا جميل على حبك بانلى دليل و انت منمتش ليه يا سى جميل
-منا جيت انام زى اللى سمعتك بتتكلمى مع حد ناديت عليكى اسئلك
-عموما الغدا جاهز لو تحب تتغدى
- لالالا غدا ايه دلوقتى لما تتلم العيال ابقى صحينى
- ماشى يا ابو حسين على مرتب الحتة يكونوا وصلوا..عن اذنك يا خويا
( خرجت ذكية من الأوضة لقت باقى الشقة مترتب والبيت نضيف وزى الفل
- يا ما شاء الله يا ماشاءالله ايه الحلاوة دى دانا امى دعيالى اكنى على اخر العمر ربنا كتبلى الراحة
( بصت حوليها وقالت)
-متشكرين يا سوداسى اضواء المنزل ههههههه
طيب انا دلوقتى هعمل ايه ادخل انام فى اوضة البنات على ما يهلوا عن اذنكم
( فى محل الأحذية وصلت هبة متأخرة ولما شافها صاحب المحل
- ايه يا انسة هبة التاخير دا كله ينفع كدا
- انا اسفة يا استاذ شاكر والله مانا السبب دى المواصلات هى السبب
- مش شغلى اطلعى من بيتكم بدرى شوية انا مدفعش مرتبات فى الهوا اول واخر مرة تحصل بعد كدا معنديش غير الفصل ..فهمتى
- ايوة يا استاذ شاكر
- اتفضلى رصى المقاسات الخاصة من الشبشب الفيونكة فوق بعضها ورتبى علب الصندل الأبيض رينجوا
- حاضر يا استاذ شاكر
- وانتى يا انسة شيماء بعد ما تلمعى البتاريين ادخلى سعديها
- تحت امرك يااستاذ شاكر
- محروس
- ايوة يا استاذ شاكر
- اوصل القهوة هاتلى فنجان قهوة مظبوط
- من عنية يا استاذ شاكر
( دخلت زبونة)
سلامو عليكم
- وعليكم السلام اامرى يا حاجة
بقولك ايه يا حضرت عايزة بولغة حريمىتكون شكلها حلو كدا
-بولغة
- اه بولغة غريبة دى
- لا ابدا اتفضلى اقعدى بتلبسى مقاس كام
- 42
-انتى متاكدة
ايوة يا حضرت مالك مستغرب ليه
- بس انا لمؤخذة شايف ان كبيرك مقاس 40
- مانا بحب الحاجة مبحبحة وكمان علشان لو مرتحتش فيه وزهقت من فرمته اديه لعطية جوزى
- جوزك هيلبس حريمى
- دا غلبان لا يعرف حريمى ولا رجالى تصدق بالله دا بيلبس والا بلاش
-لالا بلاش احسن ربنا يخليهولك بياخداى حاجة صغرت عليكى كدا من غير اى اعتراض
- يقدر يعترض نقيلى اجمد بلغة عندك يا فندى
- يا انسة هبة هاتى اكبر مقاس فى البلغة قصدى السابو الشمواه
- لون ايه
-لو فيه احمر اوموف تجيب
- والأستاذ عطية هيرضى يلبس الألوان دى
- يووووه دا بيموت فى اللون الأحمر والموف والتركواس
-التركواس
-اى والله
- اتفضلى يا مدام اللون الاحمر والموف
- اتفضلى قيسى يا فندم
- مش بطال ..بكام الجوزدا
-ب55
- بأيه 55 دا ايه ليه مترصع بالألماظ واللى مفيش منه فى البلد..هما 25 جنيه
- 25 ايه يا هانم دانتى لو جبتيه من ع الرصيف هيبقى اغلى من كدا
- هما 25 مفيش غيرهم هتخدهم والاامشى
- يا ستى مش هينفع
(طلعت مطوة قرن غزال هتاخد ال25 والا اغزك وهاخدها وامشى برضك
-ايه دا يا ست انتى انتى اتجننتى والا ايه
- متضيعش وقتى خلص
- هاتى يا ستى ال25 جنيه انا مش عايز مشاكل دى بيعة استفتاح وردها مش كويس اتكلى على الله
- ناس تخاف متختشيش
- - يا هبة يا شيماء الحقونى بكوباية مية يا بنات
- خدى اديلوا المية ربنا يتوب علينا م الغلب ده
- اتفضل يا استاذ شاكر
( بعد ما شرب اتردت روحه)
- الحمدلله متشكر يا شيماء
-العفو يا استاذ شاكر
( شاب وسيم واقف ع البترينة جريت شيماء على جوة)
-هبة ..هبة الشاب اللى كل يوم يقف ع البترينة ويقعد يبصلك جه برة وعنيه هتتخرم بيدور عليكى
-صحيح يا شيماء
- اه والله
- طب وانا هعمل ايه ميقف والا يمشى وانا ايه يهمنى
-0 اه يا هبلة دا الواد عينه منك وبعدين شكلوا مش من الشباب اياهم يعنى اهبل زى حالاتك
- اخص عليكى يا شيماء انا برضوا هبلة
-هو انا شفت اهبل منك
( شيماء اخدت الملمع والفوطة وخرجت تلمع الباترينة
- صباح الخير يا فندم
- انا صباح النور يا انسة
- فيه حاجة لفتت نظر حضرتك
- ها ييييعنى بدور
- اللى انت عايزها وبتدور عليها جوة فى المخزن بترص الشغل
- تقصدى مين
- الا مين هبة طبعا
- هى اسمها هبة
- اه اسمها هبة ايه حلو والا نغيروا
- ها لالالالا دا اسم جميل
- طيب ممكن لو سمحتى تعمليلى خدمة
-اوى عايز ايه
- ممكن تديها الورقة دى
- بس كدا من عنية يا استاذ اى خدمة
- سلاموا عليكم
- وعليكم السلام
- ايه يا شيماء الشاب دا كان بيقولك ايه
- ها ولا حاجة
- ولا حاجة ازاى انا شايفه بيكلمك
- ها هههه اه مهو كان بيسألنى على الجذمة ام شنكل وبيقول انها عجباه
- طب امال مشى ليه

- ها اا ااصله قال انه هيجيب اخته تشوفها الأول
- طيب شوفى شغلك
- القهوة يا سى شاكر
- شكرا يا محروس
( فى المخزن)
-هبة انتى يا بت
( شاورت لها بالورقة طاطاطاطااااااا
- ايه اللى فى ايدك ده
-دا جواب من العاشق الولهان ابو نظرة جنان
- تقصدى مين
- الأخ بتاع الباترينة
- والجواب دا لمين ليكى انتى
- ومالك اتخضيتى كدا ليه ... لا طبعا ليكى انتى
- واخدتيه منه ليه من غير اذنى
-كدا خلاص يا ستى بسيطة اديهوله بكرة لما يمر ف نفس الوقت انا غلطانة يا ستى
-( وهى مكسوفة)
- لا طبعا ميصحش نحرجه هاخدوا وامرى لله
- انتوا بتشتغلوا والا بتتودودوا
-- لا يا سى محروس احنا خلصنا المطلوب مننا ممكن تحل عننا
- كدا ماشى يا شيماء
- يا ساتر راجل خنيق تملى لازق زى الخملة فى قفانا
ها مش هتقرى الجواب
- لا طبعا مش وقته انا هقراه لما اروح مش عايزين ناخد جزا
- طب ابقى قوليلى كاتب فيه ايه
( فى بيت الست ذكية الباب بيخبط جامد)
فتحت ذكية الباب ورقعت بالصوت)
-حسن ابنى يا لهوىىىىىىى
انتظروا باقى الحلقات مستنية رأيكم لأنه يهمنى
#4

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى

ليه بس؟؟؟
مكنتى كملتى
انا كنت بقرأ ومركزه
ههه

حلوه دا القصه وفكاهيه

تسلم ايدك
انتظرها بتشويق
إظهار التوقيع
توقيع : ريموووو
#5

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى

جمييييييله قوى انتى عبقريه
ومتزعليش نفسك من اى حاقد يا قمر كل واحد ناجح لازم هيلاقى اللى يحاول ينسب نجاحاته لغيرة
#6

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى


المشاركة الأصلية كتبت بواسطة ريموووو
ليه بس؟؟؟
مكنتى كملتى
انا كنت بقرأ ومركزه
ههه

حلوه دا القصه وفكاهيه

تسلم ايدك
انتظرها بتشويق
ايه ده مديرة المنتدى بنفسها بتحب الروايات والقصص
يلا يا ام سجى هنيالك ههههههههههههه
كملى بقى يا قمر لان بتعب من البحث على القصه فى جوجل
#7

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى


المشاركة الأصلية كتبت بواسطة ريموووو
ليه بس؟؟؟
مكنتى كملتى
انا كنت بقرأ ومركزه
ههه

حلوه دا القصه وفكاهيه

تسلم ايدك
انتظرها بتشويق
اهلا اهلا بست الكل بتتابعبنى بنفسك اكيد انا حصلى الشرف وعلشان خاطرك هنزل بارت كمان منورة القصة يا حبى
#8

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى

رد: كائنات فضائية فى بيت الست ذكية القصة الأصلية حصريا على عدلات بقلمى
إظهار التوقيع
توقيع : فاطمة سعيد
#9

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى

جمييييييله قوى انتى عبقريه
ومتزعليش نفسك من اى حاقد يا قمر كل واحد ناجح لازم هيلاقى اللى يحاول ينسب نجاحاته لغيرة
اهلا بيكى يا حبيبة قلبى لا متشليش همى كلكم اولادى انا عمرى ما قلبى شال من بنى ادم والله وكفاية ان الموقف ده خلانى اشترك فى عدلات وان شاء الله بداية موفقة
شكرا لمساندتك يا حبيبة قلبى
#10

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى

ايه ده مديرة المنتدى بنفسها بتحب الروايات والقصص
يلا يا ام سجى هنيالك ههههههههههههه
كملى بقى يا قمر لان بتعب من البحث على القصه فى جوجل
ايه دا بقى احنا هنبتدى ار والا ايه الله اكبر خمسة وفسوخة ههههههههه
- انا بهظر ومنورنى كلكم
رد: كائنات فضائية فى بيت الست ذكية القصة الأصلية حصريا على عدلات بقلمى
#11

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى

الحلقة الرابعة
- حسن يابنى مالك يا حبيبى ايه اللى عمل فيك كدا
- اااه يا دماغى
- متتخضيش يا ست ذكية
- متخضش ازاى مانتش شايف يا واد يا حنكش رابط دماغه ازاى وسايح فى دمه
-سليمة ان شاء الله هو بس يستريح فى السرير ويشرب شفشق عصير وهيبقى زى الفل ان شاء الله سلاموا عليكم
- وعليكم السلام تعبناكوا معانا يا جماعة
ارتاح يا حبيبى ارتاح وانا اعملك العصير
-دماغى ياما مش قادر
- يا قلب امك يا بنى ان شالله العدوين يا ابو على
- فين العصير يا ما والا هى منظرة قدام حنكش واللى معاه وخلاص
-يوه جتك ايه يا دى الواد ..والنبى دا كلام تقوله ...مش هتبطل رزالتك دى تعرف حلال فى جلدك اللى بيجرالك دا
- عايز شفشق عصير زى ما قال حنكش
- من عينى
- طلباتك يا ست ذكية
- يا خراشى انتوا عارفين انا بعد كدا هقول من بقى.. من ودانى.. مش هقول من عينى تانى بدل مانا تعباكوا وانتوا خضينى كدا على طول
- انتى بتكلمى مين عندك ياما
- ايوة يا حسن انا جيبالك العصير وجايا
عن اذنك يا
الا انت اسمك ايه
- اولا انا بنت مش راجل واسمى بنادوس
- اهلا وسهلا يا ست دبوس
- ههههه بنادوس يا زيكا بنادوس
خلاص عن اذنك ام اعمل العصير لحسن
الا يا حبيبى يظهر انه اتعارك عاركة جامدة اوى اصله دمه
حامى وشهم عمره ميسيب صاحب له فى خناقة الا لما يقف معاه
- ههههه طب اتفضلى العصير روحى اديهوله لحسن قلق وبيسأل نفسه انتى بتكلمى مين
- يخليكى لية يا ست بلبوس
- بلبوس ايه اسمى بنادوس
- اعملك ايه مانتوا اساميكوا عايزة قاموسيا اسمك ايه
- يام حسين فين العصير
-ايه يا واد انت انسعرت
-خد يا خويا العصير اهو
-قولى بقى ايه اللى شحورك كدا يا عينى قصدى يا مناخيرى
- مناخيرك ايه مناخيرك دى
( احنا تحت امرك يا ست ذكية)
-يييييه حلى عنى بقى يا مقروس
-انا كلمتك يا ما انتى ايه بيحصلك تهيؤات زى حسن يوسف والا ايه
-كدا برضوا يا حسن يعنى انا مجنونة
- مانتى عمالة تقولى حاجات مش مفهومة اعملك ايه
- اشرب يا حسن العصير
-الا م الحق عصير ايه دا
-عصير ايه ..عصير ايه يا عينى
- عصير مانجة
- كأنك متعرفش عصير ايه دا يا حسن
- طعمه مش غريب علية
- دا عصير مانجة يا ابو على
- وجيبتى المانجة منين يا زيكا
- ها ..كنت عاينة حبيتين فى الفريزر ونسياهم سبحان الله زى ميكون قلبى حاسس ان دمك هيسيح وتعوذ تعوضه ههههه
لا بجد قولى يا حسن ايه اللى عمل فيك كدا
- ابدا دانا كنت بحوش بين اتنين اصحابى واتصبت فى النص
صحيح خيرا تعمل شرا تلقى
( كداب دى بنت اسمها رشا ضربته بالصندل)
- يا لهوى بالصندل
-صندل انا جبت سيرة صندل
- حد قال صندل يا بنى انت .. مين فينا اللى بيجيله تهيئوات بقى
انتى قولتى صندل ياما
- انا يا خويا لا محصلش واصحابك بيتخانقوا ليه ان شاء الله علشان هيفاء والا رشا
- رشا ررررشا مين وهيفاء مين يا اما
يابنى حد جاب سبرة رشا
- يا خبر يظهر ان الجرح خلانى مش طبيعى اه يا دماغى يانى
-واد انت مش عارفة ليه شمة ريحة انثى فى الموضوع
- ههههه وانا هتخانق بسبب انثى ليه يبعنى
انا عارفة اسأل روحك اسأل قلبك مش يمكن ضايقت واحدة كدا والا كدا واتهورت وضربتك بكعب الصندل
- صصصندل ليه يعنى وانتى مخلفة نانى والا ايه..والنبى تقفليلنا ع الموضوع دا يا زيكا وقوليلى ابويا جه والا لسة
- جه من بدرى ونايم جوة
- وجه بدرى كدا ليه
والله يا بنى مانا عارفة جرالنا ايه النهاردة انت راجع متعور وابوك راجع عيان وربنا يستر ع الباقى
-الباب بيخبط مين جاية اهو
- انتو جيتوا يا ولاد
-ايوا يا ست الحبايب
- وايه اللى لم الشامى ع المغربى
- ابدا لقيت نفسى خلصت محاضرات بدرى قولت اعدى على صبا فى طريقى واجيبها معاية
( حسن بأستخفاف مع خنفان)
-يا حنين...يا سلام ع الحنية يا سلام ع الأنسانية
-الله ايه اللى عمل فيك كدا
- رشا
- ايه
- اقصد خناقة ..شباب مع بعضيهم واخوك كان بيحوشهم عن بعض
-ياااه والله راجل يا حسام يظهر انك بتشرب بيريل كتير اليومين دول
-هاها ظريف اوى ياسى حسين
- ايه يا صبا يعنى مقولتيش لأخوكى الف سلامة واقفة ساكتة ليه كدا
( بصت لحسن بزعل )
- انا داخلة اغير هدومى
- طيب يا حبيبتى ادخلى غيرى هدومك وعلى متغيرى اكون حطيت الغدا
-ااااه ياما دماغى وجعانى اوى ياما
- يا عينى عليك يا بنى
- تحت امرك يا ست ذكيه
-الأمر لله يا امينوبوس
- انتى بتكلمى مين يا زيكا
- انا ابد يا حبيبى بكلم نفسى
- طب عامللنا اكل ايه يا زيكا يا مزبكا
- سبانخ ورز ولحمة
- اش اش ايوة يا عم خوفك ع الحاج جميل هيعود علينا وهينوبنا من الحب جانب
- لا وانت الصادق هينوبك م اللحمة نايب
طبعا ..طب دا هو الخير والبركة
-طب مت يالا يا زيكا حطيلنا ناكل
- طيب حاضر اما نتلم زمان اختكم على وصول
-الباب بيخبط
- اهى جت اهى
- سلامو عليكم
-وعليم السلام يا حبيبتى
- حسن اخويا مالك يا حبيبى
ايه اللى عمك فيك كدا
-لا بسيطة يا حبيبتى متتخضيش
- يا بت متتخضيش اوى كدا ليجرالك حاجة
-متخضش دا ايه ياما يعنى اشوف اخويا كدا ومش عايزانى اتخض
- يا بت مهو زى البغل قدامك اهو
 سيبنا م الموضوع دا ادخلى غيرى على مجهز الأكل
واصحى ابوكم
وتبقوا تحكولى يوم كل واحد فيكم عدى ازاى
- بس بشرط انتى كمان تحكيلنا يومك يا زيكا مزيكا
-ها هههههههه
- بتضحكى ليه
- اصله كان يوم متحنى كله عاهات
( دخلت ذكيه تصحى جميل لقته صحى على صوت كلامهم)
- انت صحيت يا سى جميل
- ايوة يا ذكية
-طيب يا خويا على متتوضى وتصلى اكون حطيت الغدا
(ع الأكل)
- ايه يا حسن يا بنىاللى خرشمك كدا
- احكيى يا حسن كلنا عايزين نعرف ايه الى مورم وشك كدا
- اقولكم ...صلوا ع النبى
#12

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى

قصه حلوه ومسليه ومنتظرين جديدك يا حبى
إظهار التوقيع
توقيع : fatma7072
#13

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى

ايه الجمال دا والله انا حسه انى بشوف الاحدث وانه مسلسل هههههههههه عسل عسل عسل
الى المفضله فورا ومتنسينيش فالرابط يا مبدعه
إظهار التوقيع
توقيع : Frawla
#14

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى


المشاركة الأصلية كتبت بواسطة fatma7072
قصه حلوه ومسليه ومنتظرين جديدك يا حبى
  1. انتى الأحلى يا حبيبتى منورانى وبأذن الله هكملهالكم من عنية
#15

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى


المشاركة الأصلية كتبت بواسطة frawla
ايه الجمال دا والله انا حسه انى بشوف الاحدث وانه مسلسل هههههههههه عسل عسل عسل
الى المفضله فورا ومتنسينيش فالرابط يا مبدعه
من عنية يا حبيبة قلبى نورتينى
#16

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى

جزء فل الفل حبيبتى
انتظر الجزء الخامس
ربنا يسعدك وينور قلبك كمان وكمان
إظهار التوقيع
توقيع : ريموووو
#17

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى

حلووووة اوووى كملى وابقى ابعتى الرابط وتسلمى يا قمر
إظهار التوقيع
توقيع : محبه لله
#18

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى

الجميع
- عليه الصلاة والسلام
-انا بعد ماخرجت من هنا قلت اروح ع القهوة يمكن حد يعوزنى فى شغلانة
- استنى يا حسن هجيب كوباية ميةمتكملش غير لما اجى
( دخلت ذكية المطبخ وبصوت واطى ياعينى)
-تحت امرك يا ست ذكية
- بقولك ايه يافردوس
-بنادوس يا ذيكا
- يا ستى مش وقته انا طالبة منك خدمة
- اامرى يا ست الكل
- عايزاكى تخليكى جنبى بما ان محدش هيسمعك غيرى ولما يحكى حسن اللى مر بيه النهاردة تصححيلى اللى بيكذب فيه اصلى عايزة اعرف هو حكايته ايه
-بس كدا من عنية اتفضلى كوباية المية ويالا بينا
- المية يا حبايبى
- ها كمل يا حسن
- زى مقلتلكوا انا اول ما نزلت من هنا روحت ع القهوة يمكن حد يعوزنى فى شغلانة..
-تمام-كمل يا حسن
- بصيت لقيت اتنين من اصحابى قعدوا ع القهوة وطلبولنا شاى.. فضلنا قاعدين لحد ما جتلنا شغلانة اننا ننزل عربية بضاعة فى محل اخشاب
روحنا ولسة بنزل اول حتتين خشب لقيت اصحابى شبطوا فى بعض
(كذاب)
-وشبطوا فى بعض ليه يا ترى
- اهو قلة ادب خلوا بت معدية وعاكسوها
(كداب هو اللى عاكسها)
-وقفت احوش ما بينهم ووقفت الموزة ..قصدى البت تستنجد بيه وتقولى من فضلك يا باشمهندس ابعد عنى الأتنين دول بما انك المحترم اللى فيهم
(كذاب)
دى اتخنقت معاهم وشبطت فى زمارة رقبته لأن هو اللى عاكسها
-قعد كل واحد يرمى البلوة ع التانى دا يقول انت اللى عاكستها الأول والتانى يقول لا انت اللى عكستها الأول وعنها وقامت بينهم خناقة وانا حبيت احوش اتصبت فى النص
-كداب دا اصحابه كانوا شغالين وهو اللى عاكس البنت وهى اللى مسكت الصندل وكسرت دماغه بكعبه وبالأمارة قلتله انت عارف انت بتعاكس مين يا كلب انا رشا الحاوى بنت صاحب البضاعة اللى بتنزلها دى يا حيوان
- بس وعنها الناس اتلموا ضربوهم علقة موت وودونى ع المستشفى وربطولى راسى وقالولى تسلم يا شهم
- كداب دا ابو رشا خرج حاشوا من ايد بنته وقاله امشى من قدامى لسكنك الترب
واخدوه اصحابه ع الأجزخانة وخلوا الصيدلى ربطهالوا
- هااااا بقى الناس قالولك تسلم يا شهم
- ها اه امال ايه
-فى المستشفى
- اه فى المستشفى طبعا
-ويا ترى الدكتور لما شاف الجرح قالك ايه
- قالى ايه هههههه وهيقول ايه يعنى
مجرد جرح سطحى
- واصحابك كانو بيضربوا بعض بأيه يعور يا ترى وجه فيك
- ها هااااهايكون ايه بحتة خشب طبعا
- اه دا كيد خشب صندل
- خشب صندل
- ايوا اصله بيبقى ناشف وبيعور جامد
- هههههه اما انتى عليكى كلام يا ام العيال
...وهيفرق ايه نوع الخشب
-عينى
- نعم هو عاكس البت قالها ايه
-يا لعبك يا بو كعب محنى
-ههههههه يخيبك واد
- بتضحكى على ايه ام حسين
- ابدا بضحك فرحانة بابنى وشهامته
الا قوليلى يا هبة يا بنتى محدش عكسك كدا والا كدا
- اللى بيعاكسوا كتير لكن السؤال دا لزمته ايه
- ابدا يعنى محدش قالك يا لعبك يا بو كعب محنى
(حسن برق عنيه وارتبك)
- ايه الكلام اللى بتقوليه دا ياما هو فيه حد لسة بيقول الكلام اللوكل ده
- عوكل ايه يا واد
- لوكل يعنى بلدى يا امى
- ربنا يخليك لية يا حسين دايما تترجملى اللغة اللى بتفزلج بيها اخوك الشهم الشهم اوى
-الله مالك يا اما بتلونى فى كلامك ليه فيه ايه بالظبط
- احترم نفسك واحترم وجودى يا ولد وخلى عندك دم
-انا متأسف يا حاج
- الحمدلله
- الله ايه يا هبة يا حبيبتى انتى لحقتى تاكلى
- شبعت يا امى هدخل اعملكم الشاى على متخلصوا اكل
-طيب يا حبيبتى البت مش عارفة نفسها مسدودة ليه كدا يا عينى
- لا دى مبسوطة هى بس مستعجلة علشان تلحق تقرا الجواب
- (بشويش) جواب جواب ايه
- جواب من رامى نصار ابن
صاحب شركة رامكوا للأستيراد والتصدير
-ايه ودا حكايته ايه راخر
- دا معجب بهبة بقاله فترة
- ها وبعدين
( الكل مبحلق ف ذكيه وهى بتكلم نفسها)
-فيه ايه يا مى انتى بتكلمى نفسك
-فيه ايه يا زكية مالك لو تعبانة ادخلى ريحى شوية
- قومى يا ماما ام ادخلك اوضتك
- ايه يا ولاد مالك يا حاج انا كويسة متقلقوش علية
- طب معلش يا امى يالا يا صبا ندخلها اوضيتها
- على مهلكوا عليها يا ولاد
- متخفش يا بابا
- ايه يا حاج مالك متخفش على ام حسين اوى كدا دى زى الفل ان شاء الله ( فى سره)
- اللى غايظنى بتجيب الكلام اللى بتلئحق عليه بيه دا منين
( فى اوضة ذكية)
- اتفضلى استريحى يا امى
- طب خلاص متشكرة ليكوا يا حبايبى ربنا ميحرمنيش منكوا رحوا انتوا بقى وسيبونى استريح
- طب مش عايزة حاجة يا امى
- ابدا والا اقولكم لو كوباية مية يا صبا يا بنتى يبقى كتر خيرك
- حاضر يا حبيبتى ثوانى تكون عندك
( صبا دخلت تجيب مية م المطبخ
لقت اختها ماسكة الجواب بتقراه)
-هبة كوباية ميه لماما لحسن تعبانة
( هبة خبت الجواب بسرعة )
- تعبانة مالها
- زى ماتقولى كدا مش متوازنة او مرهقة
- كدا طب حطيلها ع المية شوية مورد يريحوا اعصابها انتى عارفة ماما بتحب المية بالمورد
- عندك حق ...انما ايه الورقة اللى فى ايدك دى
- ها ااابدا دا دا كشف اسعار الجزم الجديد الأستاذ شاكر قال لازم تحفظوا الأسعار علشان تبيعوا بيها من بكرة ....بقولك ايه ودى المية لحسن تتأخرى على ماما بسرعة
- اه صحيح
-اتفضلى يا ست الكل كوباية ميه بمورد انما ايه هتروقلك اعصابك
- يخليكى ليه يا حبيبتى روحوا انتوا بالسلامة
-مش عايزة حاجة يا ست الكل
- لا بس اقفلوا الباب وراكوا
- عينى يا عينى ...يا عينى الله هما فين يا خويا نايمين والا ايه والا يمكن فى الصالة ام اطلع قصاد الأوضة وانادى يمكن مش سامعين
-( ذكية خرجت دماغها من باب الأوضة وندهت بصوت واطى عينى يا عينى
- تحت امرك يا ست ذكية
- بقالى ساعة بنده مبتردوش ليه
- مسمعناش انتى كنتى فين
- غريبة انتو مشفتونيش والا ايه
- اه كنا شايفينك وسامعينك لحد ما صبا جابتلك كوباية المية ام مورد
-المية ام مورد..مالها المية ام مورد
- ههههه اصل احنا مخلوقات مبتشوفش ولا بتسمع فى المكان اللى نشم فيه ريحة الورد او المورد
- ليه دى حتى ريحته جميلة
-اهو تركيبتنا كدا
-( فى سرها طب والله كويس لقيت حاجة اعملها تخليهم لا يشفونا ولا يسمعونا انا وابو حسين لما نحب نقول كلمتين سر ههههه احمدك يا رب)
- انتى كنتى عايزة حاجة يا ست ذكية
- استنى لما اخرج المية م الأوضة وادخلى علشان عايزاكى
- ماشى يا ست الكل
- وادى المية قدام الباب..ادخلى بقى
- ادينى دخلت كنتى غايزانى فى ايه يا ست ذكية
- كنت عايزة اعرف ايه حكاية الواد اللى اسمه رامى نصار ده وهو غرضه ايه من بنتى بالظبط ليلعب بيها والا يضحك عليها
- اسمعى يا ستى بقى رامى دا ...
#19

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى

هههههه

عسسسسسسسسل

فى انتظارك
إظهار التوقيع
توقيع : ريموووو
#20

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى


(6)

رامى نصار دا ابن نصار الدوينى صاحب اكبر شركات استيراد وتصدير المواد الغذائية ورامى محاسب خريج كلية تجارة قسم ادارة اعمال وهو اللى بيدير الشركة مع والده وملوش غير اخت وحيدة اصغر منه وهو ولد محترم ومؤدب جدا
- وهو المحترم والمؤدب يكتب جوابات وكلام فاضى من دا
- انتى زعلانة والا ايه يا زيكا دا بدل متبقى فرحانة ومبسوطة ان بنتك معجب بيها شاب من اغنياء البلد
- بينى وبينك يا محسوس
- بنادوس يا ذيكا بنادوس
- بقولك ايه مش دى القضية يا ست مفقوس
-ييييييه تانى
- سيبك م الكلام دا وخلينا فى المهم قوليلى الحق الواد دا بيحب هبة بصحيح والا بيتسلى بيها ...أقصد نيته خير يعنى وداخل جد
-يا ستى متخافيش دا نيته خير بالثلث وزى ما قولتلك دا شاب محترم ومن عيلة
- ربنا يريح قلبك زى ما ريحتى قلبى
( صوت ابو حسين جاى فى الطرقة بيكح )
- - يا نهار ابيض طيرى انتى بقى بلتوس احسن ابو حسين جاى وانا هدخل سريرى لحسن لو سمعنى بكلمك هيفتكرنى بكلم نفسى ويفتكرنى اتجننت ويبقى شكلى وحش قدامه
- طب عن اذنك يا ست ذكية
- اذنك معاكى يا حبيبتى
-ذكية ...ذكية انتى نمتى والا ايه
-لا انا صاحية يا حاج تعالى يا خويا
-ايه الأخبار عاملة ايه دلوقتى
- انا زى البمب يا خويا مفياش ايتها حاجة اطمن
- يعنى انتى متأكدة انك بخير
- اى والله يا سى جميل انا كويسة الحمدلله
- مادم كدا وسعيلى اما اريح جنبك شوية يا ذكذوكة
- ذكذوكة ..احنا فينا من ذكذوكة طب بقولك ايه يا حاج قبل متريح
ناولنى كوباية المية ام مورد من قدام باب الأوضة جنبى هنا الا ريقى ناشف
- بس كدا من عنية يا ذكية
وادى المية ام مورد حاجة تانية
-لا كدا بقى ريح براحتك يا حاج
( فى المطبخ دخلت صبا على هبة
- يا بنتى اخوكى بيستعجل الشاى و بيقولك هو شاى جملى والا ايه
-ها لالالاانا صبيتوا اهوا يالا قدامى يا شعنونة هانم
- اخيرا الشاى وصل دانا نسيت انك بتعملى شاى من اصله
- هاهاهاها ظريف اوى يا سى حسين
- كدا برضوا يا هبة وانا اللى بقول انك اختى حبيبتى الوحيدة اللى بتخاف علية
- انت زعلت يا حسين انا بضحك معاك وادى يا سيدى احلى كوباية شاى لأحلى حسين فى الدنيا
-وانا يا هبهوب فين كوبايتى
- من عنية الأتنين اتفضل يا ابو على... وانتى يا صبا كوبايتك اهى ...الله امال فين الحاج جميل
- دخل اوضته يريح ويطمن على ماما
- طب خلاص بلاش نقلقهم لما يصحوا اعملهم غيروا
انا كمان هاخد كوبايتى واريح فى اوضتى
-اااه واكيد هتطفى النور وانا مش هعرف اذاكر عموما انا هنزل اراجع شوية مع راندا واسيبك تاخدى راحتك ( ميلت عليها واهو تاخد راحتك بدل مانت زاوى نفسك فى المطبخ يا جميل
- قصدك ايه
-لا ابدا ولا حاجة ... (بتغنى ) جواب حبيبى حبيبى بخط ايده قريتوا وكل ما اقراه اعيدوا واعيدوا
( خرجت صبا وقفلت باب الأوضة وهبة مصدقت قامت اطمنت ان صبا نزلت وحسن وحسين دخلوا اوضيتهم يريحوا بعد الغدا ودخلت اوضيتها وقفلتها بالمفتاح وطلعت الجواب من جيبها وبدأت تقراه بتمعن
-بسم الله الرحمن الرحيم
الى الأنسة؟؟؟؟؟؟؟؟؟؟
انا اسف جدا معرفش اسمك لكن كل اللى اعرفه ان فيه شىء جوايا بيشدنى ليكى مش عارف ليه...شفتك اول مرة وانتى نازلة من تاكسى ويومها وقع موبايلك من غير ما تشعرى ولما مشى التاكسى وانتى كمان مشيتى جريت ع التليفون واخدته وجريت وراكى لحد مبصتيلى وبكل حجل شكرتينى ساعتها شفت احلى عنين فى حياتى ومشيتى وانا وراكى خطوة خطوة من غير ما احس او اشعر لقتنى واقف على بترينة المحل اللى بتشتغلى فيه ومن يومها كل يوم الاقى رجلى واخدانى لعندك بس لسانى زى ما يكون تقيل وخايف يعبر عن مدى اعجابى بيكى
اعرفك بنفسى
- محاسب رامى نصار الديوينى
مدير اعمال السيد نصار الدوينى والدى
ساكن مع والدى ووالدتى ولية اخت وحيدة (جودى )
لطيفة جدا وانا متأكد انكوا هتبقوا اصحاب ان شاء الله
انسة؟؟؟؟؟؟؟؟
اوعى تفتكرى انى مراهق او بهظر ام بتسلى بيكى وبضحك عليكى
ابدا والله انا عاشق للعيون اللى اسرتنى وخطفتى ومبنمش الليل بسببها
فكرى وردى عليه فى اقرب فرصة واتمنى انى الاقى القبول من صاحبة احلى واجمل عيون وساعتها هتلاقينى عندكم بكلم والدك ووالدتك وتصبح العيون دى اغلى جوهرتين ملك يمينى ارجوا متستهتريش بكلامى دانا عاشق ولهان
المحب فى صمت
رامى الدوينى
(هبة قفلت الجواب وسرحت بخيالها وافتكرت فعلا لما اداها الموبايل اللى وقع منها
ولما كان بيوقف يتفرج ع الباترينة وعينه عليها
هبة الفرحة مش مسعياها خبت الجواب وفتحت ترباس الأوضة وقالت استريح شوية بقى
-( فى شقة راندا)
راندا وصبا قاعدين يراجعوا قامت راندا جابت كوبايتين عصير
- اتفضلى يا ستى كوباية عصير اهى علشان تفوقى وتصحصحى
( دخلت الست ام راندا عليهم تشجعهم
- بقولكم ايه يا بنات انا عايزة مذاكرة صح الصح مش عايزة هظار ولا تضيع وقت
خلينا نفرح بنجاحكم ان شاء الله
- ان شاء الله يا طنط هننجح ونجيب اعلى مجموع
ومن النهاردة يا راندا ولأخر السنة المذاكرة تبقى يوم عندك ويوم عندى فوق
- لالالالالا يا صبا يا حبيبتى المذاكرة هنا ماشى انما عندك فوق مش هينفع
_ مش هينفع عندنا ليه يا طنط
- ها ابدا ..دا علشان عندكم وش جامد انما هنا مفيش غيرى انا و عمك ابو راندا حتى هو طول النهار ع القهوة ومبيجيش الا ع النوم ومفيش غيرى فى البيت انما انتوا النبى حارسكم قورطة دا غير الضيوف الجداد
-ضيوف ضيوف مين يا طنط اللى بتتكلمى عنها
-( بتحصن نفسها)
- انا جبت سيرة ضيوف أشتاتا اشتوت اشتاتا اشتوت حابس حابس
( خرجت من الأوضة وهى بتتنفض وميتة م الرعب
-هى طنط تفيدة مالها النهاردة يا راندا
- اصل النهاردة اتخضت حتة خضة عندكوا
- عندنا احنا ليه
اقولك يا ستى
#21

Dp14 رد: كائنات فضائية فى بيت الست ذكية القصة الأصلية حصريا على عدلات بقلمى

- النهاردة امك ندهت على امى من ع السلم وهى مرعوبة...وطلعت امى بسرعة لقت ركابها سايبة لما سألتها عن سبب خوفها قالت لها انهابقالها فترة بتحس باممممم اممممم
- مالك يا راندا مالك يا حبيبتى
-اممممم امممممم امممممم
- يا خبر ياطنط تفيدة يا طنط تفيدا الحقينى
- ايه فيه ايه يا صبا يا بنتى
- مش عارفة راندا مالها مش قادرة تتكلم
- يا لهوى مش قادرة تتكلم ازاى راند راندا يا بنتى مالك
- اممممم امممم
- دى زى ميكون حد قافل بقها
- ليه هو ايه اللى جرى بالظبط
- مش عارفة دى كانت بتحكيلى ع اللى حصل بينك وبين ماما الصبح وقبل ما تكمل الحكاية لقيت زى ما يكون حد كتم بقها
- يالهوى مالك يا بنتى راندا يا حبيبتى مالك
- من فضلك يا طنط كوباية ميه
-حالا يا بنتى
- ادى كوباية مية وادى كمان ازازة مورد افتحيها وادهنى لها وشها خلى روحها ترد فيها
- حاضر يا طنط ...اشربى يا راندا اشربى
- اااااه اااه
-ها احسن دلوقتى ياراندا
- اه الحمدلله يا صبا
- ايه اللى جرالك يا بنتى احكيلى
- مش عارفة يا ماما ..كنت بحكى اللى حصل بينك وبين طنط ذكية الصبح ولسة مكملتش الحكاية لقيت زى ما يكون حد حط ايده على بقى ودماغى وسمعت صوت بيقولى انسى اللى بتقوليه
- يعنى حكيتلها حد فين
- مش فاكرة
- مش فاكرة ازاى
- نسيت
- طب اسمعى الحمدلله انك نسيتى يا بنتى احنا مش عايزين نفتح ولانتكلم فى الحاجات دى احنا بنحب نمشى جنب الحيط وانا محلتيش غيرك انتى رضوى اختك شفتكم بعد ما عينى رابت
-انا مش فاهمة حاجة يا طنط
- احسنلك متفهميش يا صبا يا بنتى بقولكم ايه ذاكروا وركزوا كدا
- لا يا ماما انا مش قادرة اذاكر دلوقتى بصراحة نفسى اتسدت
- خلاص اللى يريحك يا حبيبتى اقولك اجيبلكم صنية ام على بالمكسرات اللى فاضلة فى التلاجة اتسلوا بيها وانتوا قاعدين واهو تريحوا شوية من المذاكرة لقيتى نفسك مرتاحة ذاكريلك شوية لقيتى روحك لسة تعبانة يبقى بلاها مذاكرة النهاردة ام انادى على رضوى تحلى معاكم هى فين مش باينة
- دى بتلعب ع السلم
-كدا طب اندهيلها يا صبا يا بنتى
- حاضر يا طنط
( خرجت صبا تنادى ع السلم ..رضوى يا رضوى دودى ..يا رضوى
- ايوة ياابلة صبا انا هنا اهو انتى بتنادى ع السلم ليه
- الله انتى هنا
- انتى كنتى بتلعبى فين يا بت يا رضوى
- كنا بنلعب فى اوضتى
- كنتوا كنتوا مين يا بت ..هو فيه حد بيلعب معاكى جوة
- ههههه ايوة معايا حندوقة
- حندوقة مين يا بت حندوقة دى ودخلت امتى
- مش عارفة انا لقيتها بتلعب بلعبى بس دى جميلة اوى يا ماما
- هى فين فى اوضتك يا رضوى
- ايوة يا ماما
- طب وريهانى كدا
- ملكوش انتوا دعوة بينا كلوا دى اخر صنية من 6 صوانى ام على كنت عامالهم امبارح هههههه بس هتعجبكم اوى...يالا يابت قدامى ام اشوف لعب العيال دا
-( دخلت الأوضة)
- فين يا رضوى انتى هتشتغلينا هو احنا ناقصين لعب العيال دا راخر يا مضروبة
- والله دى كانت بتلعب معايا يا ماما
- وكنتى شايفاها
اه والله وبكلمها وبتكلمنى
-طب هى شكلها ايه

- شكلها جميل اوى يا ماما بس هى جوة بالونة كبيرة
- جوة ايه يا ختى
بالونة ..بالونة ايه يا صميدة انتى
-انا مش صميدة انا رضوى
- ابوكى طول عمره كان نفسه فى واد ويسميه صميدة ولما حملت فيكى كان مجهز الأسم وجيتى بنت جتك حوسة صمم ليندهلك صميدة يالا يا صميدة بطلى تهيؤاتك دى وروحى كلى ام على لحسن دى اخر صنية
- هههههة ام على مليش نفس لأم على فيه ام صميدة ههههه
- ياختى رايقة وبتهزرى يالا يا بنت حمدان
-ها لقيتى مين جوة يا طنط
- ولا حاجة سيبك منها دى بت خيالها واسع قال حندوقة فى بالونة قال
تلاقيها طارت والا فرقعت
-متاكلى يا صبا يا بنتى
- لا يا طنط كفاية لحسن تقيلة جدا
- يا بت كلى دانا عملاها بالسمن البلدى والقشطة طب دانا واكلة صنيتين وابوا راندة اكل واحدة وراندة واحدة وصميدة واحدة ودى اخر حاجة بالصلاة ع النبى
( بصت صبا باستغراب وقالت فى نفسها يا نهار افيال كل واحد صنية دانا كلت معلقتين نفسى قفلت وانا اقول احجامكوا عائلية ليه)
-مالك يا صبا يا بنتى سرحتى فى ايه
- ها ابدا يا طنط
- اما ...ما دام صبا مش عايزة تاكل اعمليلنا دور سحلب بالمكسرات اهو نبلع ام على
- لا مش هقدر متعمليش حسابى يا طنط انا قفلت من ام على والعصير اللى شربته
- يوه جتك ايه يا صبا اتاريكى عاملة زى العصفورة
- شكرا يا طنط عن اذنك يا راندا مادمتى تعبانة ومش هتقدرى تكملى مذاكرة...سلاموا عليكم
- عليكم السلام يا حبيبتى مسيلى على ذكية
- يوصل يا طنط
وانا يا صبا مسيلى على حسن والنبى... اعبيلك طبق ام على تاخديهوله
- اخرسى يابت هو حسن مقامه طبق والنبى لاعملوا اكبر صنية عندنا حالا واطلعهاله
-دا مهيصدق اصله راجع النهاردة متعور فى دماغة
- يالهوى ودا من ايه
- لا ابدا اصله كان بيحوش بين اتنين اصحابه واتعور
يا خبر ابيض انا لازم اول ما يجى ابوا راندا اجيبه ونطلع نشوفه
( صبا طلعت شقتهم ودخلت على هبة لقيتها نايمة فتحت النور قلقت هبة
- انتى جيتى يا قلق
- ايوة جيت
- ايه دا انتى لحقتى تذاكرى
- هو احنا عرفنا نذاكر من اصله
-ليه ايه اللى حصل
- دى ناس عقلها خفيف قعدت طنط تفيدة تقول كلام غريب كدا وتعمل حاجات غريبة وتحصن روحها واشتاتا اشتوت وربتلى الخفيف
- ايه التخريف اللى بتخرفيه ده
- مش بخرف والله اقولك انا كنت فى وكر الدببه الناس دى مبتفكرش غير فى الأكل لدرجة انه مليث على عقولهم دانا زهقت انا يا ستى معنتش هذاكر مع حد ...انا هذاكر مع نفسى احسن مذاكر ربع ساعة واعلف والغ ساعة
- هههههه الله يخرب عقلك يا صبا دانتى مصيبة اهدى كدا واحكيلى يا حبيبتى ايه اللى حصل عند طنط تفيدة
-اقولك يا ستى
(فى الأوضة التانية حسن نايم ع السرير
وحسين ع المكتب وسرحان بيفتكر لما راح المدرسة النهاردة يجيب اخته ورجع معاها راندا وغادة وابتسم لما افتكر غادة ووشها احمر من الكسوف
والخجل وازاى مرضيتش تمشى وهو معاهم واستأذنت منهم لأن وجودها معاهم وحسين فى وسطيهم هيعمل لها مشكلة مع اخوها وابوها
وسا عتها بصلها حسين وهو سعيد بأدبها واخلاقها العالية اللى بيتمناها فى الأنسانة اللى يحبها
( حسن فاق لاقاه سرحان ومبتسم بصله وقال
-مالك يا حسين بتفكر فى ايه مخليك فاتح بقك وسنانك ع الصفين باينين انت بتعمل اعلان عن معجون سنان والا ايه
- ها انت بتكلمنى
- لا دانا كنت بكلم نفسى
اللى واخد عقلك يتهنابه
- رايح فين
- رايح لأخواتك البنات جايز الاقى عندهم حاجة حلوة
( خبط ع الباب)
- ادخل ياللى بتخبط
- ازيكوا يا بنات
- الحمدلله يا حسن ازيك انت
- دماغى بتوجعنى وعايز اكل حاجة حلوة ايه معندكوش حاجة حلوة مخبينها كدا والا كدا
( بصت هبة لصبا وانفتحوا فى الضحك
- يا سلام انا قلت حاجة تزغزغ والا ايه النظام
- لا اصلك ابن حلال مصفى
-حبيبة القلب كمان شوية جاية تزورك وعملالك صنية ام على من الحجم العائلى يعنى هتحلى لما ينقطع نفسك
- مين دى انتوا تقصدوا مين
- راندا وامها وابوها
- بتقولى مين لا انا مش موجود انا جالى ساكتة قلبية ونقلونى لندن بالطيارة
- هههههه الهروب مش هيفيدك يا ابو على وبعدين المكتوب ممنوش مهروب
-انتى بتتريقى علية وفرحانة فيه يا هبة ماشى محدش هيريحنى وينقذنى من زيارة الأفيال دى غير ذيكا حبيبتى
ذيكا يا ذيكا افتحيلى يا ذيكا
- ( ذكية فتحت الباب )
- حسن مالك يا حبيبى مخضوض ووشك اصفر كدا ليه انت تعبان يا قلب امك والا ايه
-لا ياما بس الست فيلة قصدى تفيدا وبنتها باندا قصدى راندا عرفوا ان انا متعور وحالفين ليجبولى صنية ام على ويطلعوا يعلفونى ..قصدى يزرونى وانا خايف مش عايز اقابلهم حاسس لو قعدوا وطولوا ضغطى هيعلى ودماغى هيوجعنى اكتر ابوس ايدك ياما انا مش عايز قاعدتهم تطول
- طب بس بس اهدى يا حسين ومتخفش انا عندى اللى ميخلهمش يطولوا هنا
- عندك ..تقصدى مين ياما
-افكارى عندى افكارى هغلس عليهم لحد ميستأذنوا روح انت اوضتك استريح وسيب الباقى علية
( وقفت ذكية تبص شمال ويمين ولما اتأكدت ان الطرقة فاضية ندهت وقالت)
-عينى.. يا عينى
- تحت امريك يا ست ذكية
بقولك ايه يا واسووس
- ب ن ا دوس ..بنادوس
- ما علينا جيرانا اللى تحت هيطلعوا يزوروا حسن علشان متعور وحسن خايف ليطولوا
قلت اما اقولكم تعملولى الخدمة دى وتقلقيهم وتخلوهم يمشوا بدرى بدرى
- بس كدا يا ست ذكية علم وينفذ
( الباب بيخبط )
- ايوة مين
- الحاج حمدان تفيدة اهلا يا حاج اتفضل
- استنى يا تفيدة ام افتحلك دلفة الباب التانية
ادخلى يا راندا يا بنتى ...صميدة حبيبتى ادخلى يا قمر
- الف سلامة على حسن يا ست ام حسين
- الله يسلمك يا حاج حمدان اتفضل
#22

افتراضي رد: كائنات فضائية فى بيت الست ذكية القصة الأصلية حصريا على عدلات بقلمى

تسلم ايديك
الف شكر
إظهار التوقيع
توقيع : الملكة نفرتيتي


قد تكوني مهتمة بالمواضيع التالية ايضاً
الموضوع كاتب الموضوع المنتدى
حكايات الست عدلات مع عدلات عرافة الناس الذوات كتكوتة صور x صور
مدينة بيت لحم تتحدث عن نفسها اماني 2011 عدلات للسياحة والسفر والرحلات
[ صيام الست من شوال] أم أمة الله فتاوي وفقه المرأة المسلمة
شات قعدة ستات فى بيت الست عدلات أنا قررت أعلنها حرب على الراجل بس مش ا ام جنى وبس دردشة عدلات
] من سيربح المليون مع الست اطاطا ؟؟؟؟؟؟؟؟ ام جنى وبس فرفشة عدلات


الساعة الآن 01:07 PM

الاتصال بنا - عدلات - الأرشيف - أعلي الصفحة

جميع المشاركات تمثل وجهة نظر كاتبها وليس بالضرورة وجهة نظر الموقع


التسجيل بواسطة حسابك بمواقع التواصل