مستلزمات الجهاز ياعروسة / مستلزمات كل عروسة / جهاز العروسة / قايمة العروسة / جهاز

السلام عليكم...

أنا قولت أعمل الموضوع ده عشان أفيد بيه كل البنات اللي بتجهز أو قربت تتجوز ومحتارة ومش عارفة تشتري إيه ومتشتريش إيه؟

وأنا شخصيا هأقولكم من خلال خبرتي المتواضعة جدا في الموضوع ولأني متزوجة حديثا وكمان نزلت كتير ولفيت وقعدت أدور ونزلت مع كتير من صحباتي عشان نشتري مستلزمات الجهاز

أول نصيحة أحب أقولها لك ... اهتمي بالجودة بتاعت أي حاجة تشتريها حتى لو الكم هيكون قليل وطبعا كل واحدة وحدود إمكانياتها واحتياجاتها
بس أنا بأشوف أنك لو اشتريتي حاجة جودتها كويسة وماركة معروفة حتى لو هتدفعي أزيد سنة فده مع مرور الوقت هتكتشفي إنه أوفر لك بكتير من إنك تشتري حاجات كتير جودتها مش أد كده وكل شوية تبوظ فتصلحيها أو تشتري غيرها... كإنك رميتي فلوسك في الأرض

تاني نصيحة اشتري احتياجاتك بس بغض النظر عن كلام الناس والبنت لازم تشتري كذا وتعمل كذا ... لأنك في الآخر أنتي اللي هتدفعي مش الناس
وبعدين أنك تشتري حاجات قليلة جودتها كويسة أحسن ماتشتري حاجات كتيير بس ملهاش لزمة وأي كلام

أنا هبتدي معاكي بالمطبخ لأن حاجاته كتيرة جدا ومبتخلصش

والجملة الشهيرة ... ممكن تفضلي لحد يوم الفرح الصبح تشتري في حاجات وحاسة إنك لسه مخلصتيش
طبعا محبكيش توصلي للمرحلة دي

حاولي نشتري حاجاتك وتخلصي كل حاجة على أد ماتقدري ... واللي متعرفيش تخلصيه قبل الجواز أبقي اشتريه بعدها الدنيا ما أتهدتش...

اكتبي كل احتياجاتك في ورقة تبعا لأولوياتها واستشيري ناس سبقوكي تكوني بتثقي فيهم

طبعا المطبخ فيه:

1. حلل (تيفال – أستانلس – صاج - ألومنيوم) ...

[IMG]https://fbcdn-sphotos-a.***- /hphotos-ak-snc7/310848_246054622109782_202232713158640_639343_1909747551_n.jpg[/IMG]

أنا شخصيا أنصحك بشراء حلل تيفال للأرز والمكرونة والحاجات اللي ممكن تلزق وتتعبك في التنضيف وأستانلس في سلق اللحوم وطهي الخضراوات ... لأنهم عمليين جدا وصحيين جدا أكتر من الألومنيوم اللي بيسبب أمراض مع مرور الوقت والصاج لو الحلة اتخدشت هيبقى مفروض تترمي ومتستعمليهاش ... هتقوليلي طب ما التيفال برضو ممكن يتخدش .. هأقولك استعملي معلقة خشب

والتيفال فيه ميزة عدم الالتصاق وتنضيفه سهل جداااااااااا وطبعا اشتري التيفال من نوع معروف وأنا شخصيا شايفة أن أحسن نوع تيفال هو برستيج يليه تيفال زهران ... وأنا شخصيا جربت الاتنين برستيج التيفال بتاعه أمتن وفيه طبقات أكتر ومعاه ضمان مدى الحياة ... الأستانلس مش فارقة أوي أهم حاجة قاعدة الحلة تكون سميكة والحلة لما تيجي تمسكيها تحسي أنها تقيلة

2. صواني (تقديم – فرن – صواني كيك) ...

[IMG]https://fbcdn-sphotos-a.***- /hphotos-ak-snc7/301068_246059628775948_202232713158640_639375_1031731269_n.jpg[/IMG]
صواني التقديم دي خاضعة لذوقك وإمكانياتك إنما أنصحك أنك تشتري صواني الفرن والكيك تيفال وزي ما قولت قبل كده أن أحسن نوع هو برستيج هتشتريه وبجد هتنسيه ... عايزة تعملي كيكة وتقلبيها هتتقلب معاكي وعمرها ماهتلزق في ناس بتشتري صواني ألومنيوم وطواجن بيركس .. البيركس جميل وصحي جدا وكل حاجة بس عايز معاملة خاصة جدا وحرص

3. الكيتشن ماشيين...

[IMG]https://fbcdn-sphotos-a.***- /hphotos-ak-ash4/299646_246046332110611_202232713158640_639294_1227975563_n.jpg[/IMG]

في ماركات كتيرة جدا كويسة تتناسب مع إمكانياتك ... في براون ومونليكس وكينوود ... أنا شخصيا شايفة أن كينوود من أفضل الماركات لكذا سبب ... أولا هي ماركة عالمية معروفة جدا .. ثانيا بتوفر أغلب احتياجاتك (خلاط.. كبة.. مضرب بيض.. أسلحة تقطيع وبشر..عصارة برتقال) في جهاز واحد بسعر تحفة جدااااااااا ده غير أنك لو متابعة قناة فتافيت هتلاقي أغلب البرامج بتستخدم كينوود في أغلب الاستعمالات ... ممكن لو شايفة أن الكيتشين ماشيين ملهوش لزمة أو مش هي دي احتياجاتك تشتري خلاط بمطحنة وكبة (لأنك تقريبا دي أكتر حاجات بتستخدميها في الكيتشن ماشيين بشكل يومي يعني مينفعش تستغني عنهم)

4. طقم سكاكين ومعالق ... المعالق اهتمي أنك تشتري حاجة مصنوعة من الأستانلس عشان تعيش معاكي من غير مالونها يغير وطبعا أحسن

حاجة ف الأستنالس ... الألماني (طبعا هو أغلاهم) ...وده أنصحك تخليه للسفرة وتجيبي طقم تاني (6قطع من كل من الشوك والسكاكين والمعالق) تخليه للمطبخ ... بالنسبة للسكاكين ففي طقم سكاكين برستيج حلو جداااااااااا وأنا زعلت أوووووي أني معرفتش أن برستيج بتنزل أطقم سكاكين بسعر تحفة ومعاه حامل خشب تحطي السكاكين جواه وكان نفسي أرجع طقم السكاكين بتاعي وأجيب برستيج بس ملحقتش أعمل كده لأني اتزنقت في الوقت

5. الكوبايات والكاسات:







طبعا هتشتري كوبايات للشاي وشوبات للماء وكاسات للعصير ده غير حاجة النيش ... يستحسن أنك تشتري من كوبايات الشاي طقمين زي بعض وكذلك في الكاسات عشان لو جالك عدد كبير يبقى الحاجات كلها زي بعض


نآخد فاصل ونرجع نواصل إن شاء الله